Miguel de Los Toyosek Beraunen hobetu beharrekoak ezagutu ditu
Lurralde Plangintza eta Hiri Agendako kontseilariordea auzoan izan da Palencia alderdikidearekin, bertan egingo diren inbertsioak goraipatuz.
Miguel de los Toyos eta Isaac Palencia, joan den larunbatean, Beraunen. 
Joan den urteko urrian iragarri zuen Eusko Jaurlaritzak 101 milioi euroko inbertsioa egingo zuela EAEko 14 auzo biziberritzeko. Horietako bat Beraun da, guztira 3,25 milioi euro bideratuko dituelarik bertara Jaurlaritzako Lurralde Plangintza eta Garraio sailak.
Testuinguru horretan, auzoa bertatik bertara ezagutzeko asmoz, ingurua bisitatu zuen joan den asteburuan Miguel de Los Toyos Lurralde Plangintza eta Hiri Agendako kontseilariordeak. Ibilaldia Isaac Palencia Errenteriako PSE-EEko bozeramailearekin egin zuen, hark erakutsi zizkiolarik auzoko txoko ezberdinak.
De Los Toyosek iragarri zuen biziberritze aurrekontuak honako helburuak izango dituela: oinezkotzea, irisgarritasuna, eta elkarbizitza sustatuko duten hiri-espazioen eraberritzea sustatzea. Kaleko lanez gain, eraikinen birgaitzea, bizigarritasuna hobetzea eta efizientzia energetikoa handitzea izango dira ardatz nagusietako beste batzuk.
Azalpenak eman zituen Jaurlaritzako ordezkariak: “Biziberritze programak bi esku-hartze nagusi izango ditu, bata, etxebizitzetan, eta bestea, inguruan, bizi kalitatea eta ingurumen iraunkortasuna indartzeko”. Errenteria-Oreretako ordezkariak gehitu zuen akordioak erakusten duela alderdi sozialistak lanean jarraitzen duela udalerria hobetzeko, eta badela garaia “inbertsio garrantzitsuak” bertara heltzeko, batez ere, auzoetara.
