[Argazki galeria] Garaipen bakarra Gipuzkoako Batel Ligan, San Pedrorena
Mutilen Gazte Mailan lortu zuten garaipena moreek. Beste kategorietan bigarren postu asko lortu zituzten Oarsoaldeko batelek.
Larunbat eguerdian jokoan izan zen Gipuzkoako Batel Ligako bosgarren jardunaldia, Xuxa Urkiaren omenezko estropada hain zuzen. Hibaika Arraun Elkarteak antolatu zuen lehia. Jokoan izan ziren zortzi kategorietako lehietatik, bakarrean lortu zuen Oarsoaldeko ontziek garaipena (Bidasokorik ez da parte hartzen ari): San Pedroko Gazte Mailako mutilek eraman zuten estropada zakura. Herrialdeko ligako bosgarren jardunaldia izan arren, hirugarren puntuagarria izan zen larunbatekoa: urtarrilaren 15eko eta 22koak bertan behera gelditu ziren eguraldi txarragatik.
Mutilen Gazte Mailan, San Pedrok irabaztea lortzeaz gain, morren B ontzia hirugarren izan zen, Hibaikarena laugarren, eta San Juanen eta San Pedroren mistoak seigarren eta zazpigarren hurrenez hurren.
Nesken Haur Mailan Hernani izan zen irabazle. Maila horretan Oarsoaldeko lehena Hibaika Bkoak izan ziren (bosgarren), San Pedro A atzetik izan zutelarik.
Nesken Promesa mailan, berriz, Hernani aldera joan zen berriz ere garaipena. Kategoria horretan Oarsoaldeko lehena San Juan A izan zen (zazpigarren), eta ondoren sailkatu ziren Hibaika B (zortzigarren), eta San Pedro B (hamabigarren).
Mutilen promesetan, aldiz, San Pedro bigarren izan zen Tolosaldearen atzetik. Zazpigarren eta zortzigarren geratu ziren hurrenez hurren San Juan A eta San Pedro B. Geroago gelditu zuen kronoa Hibaikaren bi ontziek.
Nesken Gazte Mailan ere bigarren postua Oarsoaldekoentzat, kasu honetan San Juan Arentzat: hiru segundoko aldea atera zien Tolosaldeak. Laugarren izan zen Hibaika, eta bosgarren San Juan B.
Mutilen Gazte Mailan ere bigarren koskarekin konformatu behar izan ziren sanpedrotarrak, Tolosaldetik sei segundora iritsi zirelako bidea osatzera. Hirugarren izan zen San Juan, eta bosgarren Hibaika.
Emakumeen absolutuetan ez zen Oarsoaldeko batelik izan. Gizonenean bai: San Juan A eta C hirugarren eta laugarren geratu ziren; San Pedro seigarren; eta San Juan B bederatzigarren.
- Larunbateko estropaden emaitza zehatzak jakiteko, klik egin hemen (PDF artxiboa jaitsiko da).
- Gipuzkoako Batel Ligaren sailkapenen berri izateko, klik egin hemen (PDF artxiboa jaitsiko da).
Ondokoak, larunbateko hainbat irudi dira:
