Futbito txapelketa antolatu dute Kuadrillategik eta Papinek
Pasai Antxoko gazteen eragileek bat egin dute 12 eta 16 urte bitartekoei zuzendutako txapelketa antolatzeko. Finala Papin Egunean izango da.
Pasaiako Kuadrillategiko gazte batzuk. 
Pasaiako Kuadrillategi eta Papineko Gazteria eragileek bat egin dute Pasai Antxon gazteentzako futbito txapelketa antolatzeko. Izen ematea zabalik da jada, eta hala mantenduko dute hilaren 13ra bitarte.
Parte hartzaileek 12 eta 16 urte bitarteko jokalariekin taldea osatu beharko dute, 7 eta 10 lagun bitartekoa. Horrez gain, entrenatzaile bat ere beharko dute euren jarduna zuzentzeko. Eskakizun horiek betetzen badituzte, izena eman ahalko dute posta elektronikora idatziz edota Kuadrillategiren Instagrameko kontuaren bidez (@ktg_pasaia).
Final handia apirilaren 22an izango da, II. Papin Egunarekin bat eginez. Larunbat horretarako egitarau txukuna prestatzen ari direla ziurtatu dute gazteen taldekoek, baina ez dute oraindik informaziorik aurreratu.
