Euskal Herriko XIV. Mus Txapelketa Donibanera ekarriko dute
Bixi-Bixik antolatuko du lehen kanporaketa. Txapeldunek, besteak beste, 3.000 euro eta lau lagunentzako Karibera bidaia irabaziko dituzte.
Lehen mus kanporaketa Bixi-Bixiren elkartean lehiatuko dute. 
Euskal Herriko XIV. Mus Txapelketarekin bat egingo dute Donibanen, Bixi-Bixiren ekimenez. Lehen kanporaketak jokalariek euren herrietan lehiatuko dituzte, eta horretarako data hilaren 11n izango dute sanjuandarrek.
Larunbat honetan, beraz, 17:00etan egingo dute bat muslariek Bixi-Bixiren Meipiko elkartean. Bertan lehiatuko dituzte lehen partidak, eta irabazleak herrialdeko kanporaketetara sailkatuko dira, martxoaren 11n leku hartuko dutenak. Euskal Herriko final handia Bizkaian izango da, martxoaren 25ean.
Euskal Herriko Mus Federazioak txapelketarako prestaturiko arauen arabera jokatu beharko dute partaideek. Erakundeak sari erakargarriak banatuko dizkie irabazleei; horratx:
- Txapeldunentzat: Txapela, garaikurra, 3.000 euro eta Karibera bidaia (dena barne) lau lagunentzat.
- Txapeldunordeentzat: Garaikurra, 1.500 euro eta Karibera bidaia (dena barne) bi lagunentzat.
- Hirugarren bikote sailkatuarentzat: 750 euro eta asteburuko egonaldia lau lagunentzat.
- Laugarren bikote sailkatuarentzat: 500 euro eta euskara ikasteko urte osorako bi matrikula.
- Bosgarren bikotetik zortzigarrenera sailkatutakoentzat: 250 euro.
- Seigarren bikotetik hamaseigarrenera sailkatutakoentzat: 100 euro.
- Herrialdeko finaletan ere bestelako sariak banatuko dituzte.
