Zabalik da, berriro, Pasaiako ludoteketan izena emateko epea
Ikasturtearen bigarren zatia hilabete honetan hasi eta ekainera bitarte luzatuko da. Epe horretarako, 28 euroko kuota ezarri dute.
Donibaneko ludoteka da berritu duten azkena. Honakoa, emaitzaren zati bat. 
Donibane, Antxo eta Trintxerpe-San Pedroko udal ludotekek matrikulazio epea berrireki dute hil honetan, eta hala mantenduko da otsaila bukatu bitarte. 2022-2023 ikasturteko bigarren zati honetan, oraindik ere ludoteketako bazkide ez diren haurrek aukera izango dute inskribatzeko.
Zerbitzua 4 eta 12 urte arteko pasaitarrei dago zuzenduta, eta orain arte arratsaldeetan eta larunbat goizetan ludotekaren jarduerekin bat egin dute 250tik gora gaztek. Hiru zentroen ordutegia honakoa da: astelehenetik ostiralera 17:00etatik 20:00etara, eta larunbatetan 11:00etatik 13:00etara; ordu horien baitan, adinaren araberako txandak eratu ohi dituzte arduradunek.
Ikasturte honen bigarren zatirako —otsailetik ekainera bitarte luzatuko da— ezarritako kuota 28,66 eurokoa da. Eskabidea formalizatzeko unean, kuota ordaindu beharko dute interesdunek. Hori egiteko, ludoteken egoitzetara bertaratu beharko dute. Hauek dira helbideak eta harremanetarako datuak:
- Antxoko ludoteka (behin-behinean La Anunciata ikastetxeko etxabeetan). Telefono zenbakia: 623 28 62 60. Antxoko posta elektronikoa, hemen klik eginda.
- Donibaneko ludoteka (J. J. Otaegi plazan). Telefono zenbakia: 943 34 43 28. Donibaneko posta elektronikoa, hemen klik eginda.
- Trintxerpe-San Pedroko ludoteka (Espinosa de los Monteros plazan) Telefono zenbakia: 943 39 25 10. Posta elektronikoa, hemen klik eginda.
