Ondoz ondoko hirugarren garaipena Donibane Bonantzarentzat
Azken garaipenari esker, lehen postua tinkotu dute arrosek. Gazteek 25na berdindu dute, eta bigarren taldearen lehia bertan behera gelditu da.
Defentsa lan bikaina egin zuen Donibane Bonantzak larunbatean, etxean. 
Donibane Bonantza eskubaloi taldeak sailkapeneko lehen postua egonkortu du joan den asteburuan, Egia taldearen aurka 24-19 irabaziaz. Esan bezala, lehena da talde sanjuandarra gaur-gaurkoz Gipuzkoako Gizonezkoen Bigarren Mailan.
Aurretik hiru jardunaldi besterik ez dituztela, ligako sailkapenean berdinduta dira lehen hiru taldeak (Elgoibar eta Bayona dira, hurrenez hurren, bigarren eta hirugarren). Inauteriek atsedenerako tartea emango diete orain eskubaloilariei.
Etxean izan zuten lehia arrosek, larunbatean, eta hasiera-hasieratik eutsi zioten erritmo biziari bertakoek, defentsa indartsuari esker 12-9ko aldearekin heldu zirelarik atsedenaldira. Aipatzekoa, bigarren zatian zehar Donibaneko atezainak egindako lan txukuna, bertakoen abantaila are eta gehiago haz zedin ahalbidetuz.
Gazteen taldeak 25na berdindu zuen larunbatean Aloña Mendiren kontra, Federazio Txapelketako estreinaldian. Prestatzaileek aitortu dute Donibanekoek “lan ona” egin zutela, “fisikoki argi eta garbi maila hobea zuen taldearen kontra”.
Azkenik, Donibane Kalaburtzak ez zuen, Bonantzaren kategoria berean, partidarik jokatu asteburuan. Erreka Bergararen kontra zuten hitzordua, baina hura bertan behera gelditu zen eta oraindik zehazten ari dira partidarako data berria.
