[Galeria] Onbidean, 2024ko San Fermin Txikiak, Gure Zumardian
Antxon lurpeko topo geltokia egiteko obrak "erritmo onean" doazela ziurtatu dute. "Urte eta gutxian", plaza nagusia libre espero dute.
Arriola eta Gomezek, hurrenez hurren, hartu zuten hitza atzoko agerraldian, Sasuategiko ahoaren kanpoaldean. 
Atzo goizean Antxoko topoaren geltoki berria eraikitzeko obren egoera egiaztatzeko agerraldia egin zuten arduradun politiko eta teknikoek. Bisitaren bukaeran, Sasuategiko ahoan, —Luzuriaga inguruan egiten ari diren zuloa—, Iñaki Arriola Eusko Jaurlaritzako Lurralde Plangintza, Etxebizitza eta Garraio sailburuak eta Pasaiako alkate Izaskun Gomezek hartu zuten hitza.
Arriolak ziurtatu zuen, “seguruenik”, maiatzean hasiko direla etorkizunean trenbidea hartuko duen tunela hondeatzeko lanekin. Izan ere, orain arte egiten aritu diren zuloa —Sasuategikoa— larrialdietarako irteera izango baita etorkizunean, baina ez da hura izango topoaren ohiko bidea [alboko irudian ikus daitezke detaileak]. Trazadura hori, beraz, larrialdietakoa, topoaren tunelarekin lotuko dute.
Dagoeneko 150 metro zulatu dituzte Sasuategiko ahotik, eta beste 180 metro falta dira lotunera heltzeko. Puntu horretatik aurrera, tunela Antxoko kalepetatik zulatzen jarraituko dute, Gure Zumardiko geltokira arte. Saihesbidearen ekialdeko muturrean, Galtzarabordan, lantalde teknikoak ere lanean ari dira lurra prestatzen, tunela fronte horretatik ere hondeatuko baitute.
Gure Zumardia
Obra aurreikusitako epeen arabera gauzatzen ari dela ziurtatu zuten arduradunek atzoko agerraldian. Bide zailena Sasuategiko lehen metroetan egin dute, eta egungo puntutik aurrera “eremua hobetzen” ari denez, arinago lan egingo dutela aurreikusi dute.
Hori horrela, Gure Zumardiko hesiak ere aurreikusitako epean kenduko dituzte. Alkateak neurri horrek bizilagunen egunerokoan izango dituen onurak gailendu zituen atzo: “Urtebete eta gutxian gure alameda maitea, Gure Zumardia, estalita izango da, eta kalteak askoz ere txikiagoak izango dira. Bien bitartean, bizilagunei pazientzia apur bat eskatu nahi diet “.
Esan dutenaren arabera, 2024ko otsailetik urte bereko abuztura bitartean berrerabili ahalko da berriro plaza nagusia. Beraz, egoera muturrekoenean jarrita ere, 2024ko San Fermin Jaiak agian ez, baina San Fermin Txikiak bai —irailean— , Gure Zumardian ospatu ahal izango dituzte
Beste lan-fronteak
2022ko udaz geroztik ari dira egiten Gure Zumardiko lurpeko geltokiaren egitura osatuko duten pantaila-hormak. Lan horiek hiri-bilbearen gaineko eraginekin bateragarriak dira, eta oso fase desberdinetan daude. Hamarretxeta kalea desbideratu zuten horretarako, eta “datozen hilabeteetan” itzuliko da jatorrizko posiziora, ziurtatu dutenez.
Bestalde, berriki hasi dira, halaber, Molinao erreka desbideratzeko lanak. Erreka desbideratu ondoren, Gelasio Aranburu kaleko zerbitzuak desbideratuko dira, eta egungo erreka beteko da, inguruko pantailak egiteko. Topoaren bidea eginda, Molinao jatorrizko lekura itzuliko da, eta Ibaiondorantz jarraituko dute obrek.
