Autonomoen kotizazio sistema berriaren gaineko tailerra egingo dute
Hilaren 28an izango da tailerra, Oarsoaldea Garapen Agentziaren Mamut eraikineko bulegoetan, Oiartzunen. Bi ordukoa da, eta doan.
Zenbat ordainduko dut 2023an? Hori izan daiteke langile autonomoek egun duten zalantzetako bat, ez nolanahikoa gainera. Bada Oarsoaldea Garapen Agentziak, eskualdeko enpresa txikietako arduradunei eta autonomoei zuzendutako tailerra antolatu du, informazio hori eta askoz gehiago helarazteko. Hilaren 28an izango da informazio topagunean, 14:30etik 16:30era, agentziaren Oiartzungo bulegoetan (Astigarragako bidea, 2. Mamuteko bulego eraikinean dago). Streaming bidez ere jarrai daiteke tailerra. Doan da, eta aldez aurretik izena eman behar da. Klik egin hemen izen emate formulariora joateko.
Tailerrean, autonomoen benetako diru sarrerengatik kotizazio sistema berriaren gaineko azalpenak emango dizkiete, RETA izena du kotizazio sistema berriak. Hala, bi orduko lanaldian horri begirako alor guztiak azalduko dizkiete adituek izena eman dutenei, hala nola altan emateko urratsak, alta horri lotutako betebehar eta aukera berriak, kotizazio taula orokorrak, urteko etekin garbien kalkulua, edo diru sarreren aurreikuspena betetzen ez bada gerta daitekeena.
Tailer praktikoa izango dela aurreratu dute Oarsoaldeko kideek, “bertaratutakoek informazioa eta tresnak eraman ahal izango dituzte, beren egunerokotasunean aplika daitezkeenak, funtsezkoak negozio bat kudeatzen duen, edo berri bat hasi nahi duen edonorentzat”.
