[Argazki galeria] Barrutia, behintzat, 'mozorrotuta' zuten
Pasai Antxon, Topaguneak eta Papineko Gazteriak elkarlanean antolaturiko inauterietako gaia topoko obrak izan dira.
Txikienek dantza koreografiak ere prestatu zituzten desfilerako. 
Inauterietarako, beste inon baino agertoki apropos eta egokituagoa izan dute aurten Antxon, topoko obrak izan baitira mozorrotzeko gaia. Soinean orotarikoak eraman badituzte ere, kaleak apaintzeko beharrik ez dute izan antxotarrek.
Topagunea eta Papineko Gazteria eragileek elkarlanean antolatu zuten ospakizuna, eta harrera ederra egin zioten horri bizilagunek larunbatean. 17:30ean abiatu zen karrozen desfilea Ibaiondotik Biteri plazara, eta bertan egin zuten sorkuntza onenaren aldeko bozketa ikusle nahiz parte hartzaileek. Aurtengo irabazleek aukeratzen duten gaia zuzenean sailkatuko da 2024ko inauterietako gaien finalerako.
Karropoteoa gaiaren arabera mozorrotutako tabernaz taberna egin zuten gero, eta horrek aukera eman zien bataren eta bestearen apaingarriak miresteko. Herri afarirako txartelen bitartez bozkatu zuten bizilagunek onenaren alde, eta Dani taberna izan zen irabazlea.
