Egunero zerbait ikasten delako, ‘Egun oro’ eta euskaraz
‘Euskaldunon Egunkaria’ indarrez itxi zutela oroitarazteko eta ondoren sortu zen herrigintza eta euskalgintza olatua aitortzeko, Orereta Ikastolak hainbat jarduera antolatu ditu aste honetarako.
Orereta Ikastolak, Kilometroen harira abian duen urte osoko lanketaren harira, Euskaldunon Egunkaria-ren indarrezko itxiera gogoan izango du. Hainbat jarduera antolatu dituzte datorren aste honetarako, herritar orori zabalik denak. Euskaran, herrigintzan eta elkarlanean oinarritutako espazioak sortu nahi dituzte, eta ezaugarri horiei jarraiki landu dituzte gaurtik ostirala artekoak, nahiz aurrerago iritsiko direnak. Gaur bete dira hogei urte Egunkaria armekin itxi zutela.
Itxieran baino, 2003ko otsailaren 3an bertan eta ondoren izan zen elkartasun uholdea izan nahi dute gogoan, Egunero egunkariak argia ikustea ahalbidetu zuena. «Euskal Herriko pertsona askoren eta Egunkaria-ko langileen esfortzu pertsonalaren ondorioz, egun batetik bestera sortu zuten Egunero. Horri aitortza lana da antolatu ditugunen oinarria. Euskalgintzatik eta herrigintzatik nola ahalegin kolektibo bat egin zen euskarazko prentsaren alde», adierazi du Beñat Irasuegi Kilometroen komunikazio lantaldeko kide eta Orereta Ikastolako gurasoak. «Txarrenean gelditu beharrean, aurrera egiteko esfortzu horri eman nahi digu garrantzia. Aurrera begira ere, denen inplikazioa beharko delako, herrigintzatik abiatuta, euskararen alde egiteko», zehaztu du.
Aurrera begirako horretan, gazteak aipatu ditu Irasuegik. Haiei dagokienez, ikasleak: «Azken batean ikastola bat gara. Ikasleak dira komunitatearen subjektu nagusietakoa. Haiek egindako agerkari bat banatuko da astean zehar [bihar], Egun oro izenekoa, eta zortzi orrialdekoa. Haien inplikazioa beharrezko ikusi dugu, gertatutakoaz jabetzeko, egunkari bat egun batetik bestera egitea zer izan zen jakiteko, eta euskarazko prentsaren aldeko jarrera sustatzeko».
Izan ere, Irasuegik azaldu du Egunkaria-renaren antzeko memoria ariketetan arlo intelektuala asko zaintzen dela, baina haien eskuekin agerkaria egitea, bizitzea zer den egunkari bat egitea, oso presente izan dutela. «Ilusio handiarekin ibili dira lanean. Berria-ko erredakzioa bisitatu zuten, errotatiba, elkarrizketak eta erreportajeak egin dituzte… Gogoz egin dute lan». Egun oro-ren 5.000 ale banatuko dituzte bihar.
