'Karpeta urdinak', torturaren erdigunera bidaia
Ander Iriarte zinemagile oiartzuarrak torturaren gainean egindako dokumentala da 'Karpeta urdinak'. Emanaldia doan da, baina tokiaren erreserba egin behar da.
Hilaren 24an (ostirala), Lezoko Zinema Ttikiaren saio berezia jasoko du Gezala Auditoriumak 19:00etatik aurrera: Ander Iriarte zinemagile oiartzuarraren Karpeta urdinak lana emango dute. Lezoko Udalaren neguko kultur programazioaren barrukoa da emanaldia. Ikus-entzunezkoaz gozatzeko aukera doan da, baina aurrez tokiaren erreserba egin behar da (egin klik esteka honetan erreserba kudeatzeko).
Besteak beste, 2022ko Donostiako Zinemaldian ikusgai izan zen sorkuntza.
Iriarte bera da dokumentalaren ildoa jarraitzen lagunduko duen protagonistetako bat. Jaurlaritzaren torturaren gaineko ikerketa lan batean oinarrituta, eta jakinik haren aitak [Joxe Iriarte Bikila] torturak jasan zituela, ikerketa egin zutenekin hitz egiten du sortzaileak, gaiaren muinera joateko. “Gustatuko litzaidake dokumental hau gogoratzea Euskal Herrian gertatu denaren dokumental bezala, ez kasu indibidualena. Nire desioa da dokumental honek jendea amorraraztea, eta nolabait bidea irekitzea orain arte ukatu zaien egia, justizia eta erreparaziorako”, esan zion HITZAri Iriartek, dokumentalaren harira emandako elkarrizketan: “Argi utzi nahi dudana da filma ez dela nire aita eta niri buruzkoa, baizik eta aitaren kasua izan zela abiapuntua, akuilu bat. Aitak eta biok egia berrestearen bidea elkarrekin egin dugu, dokumentalean zein bizitza errealean”.
Honakoa da lanaren sinopsia:
Anderrek, beste askok bezala, aitak komisarian jasan zuena tortura izan zela susmatzen du. Bere ustea argitu nahian, Eusko Jaurlaritzak Bake eta Bizikidetza Plana-ren barruan egindako Proyecto de investigación de la tortura y malos tratos en el País Vasco entre 1960-2014 ezagutuko du. Ikerketa horrek argitaratzen dituen emaitzekin ikaratuta, proiektuan parte hartu zuten mediku, psikologo, psikiatra eta abokatuekin elkartuko da. Haiek erakutsiko diote zer diren tortura psikologikoa, Istanbulgo Protokoloa edo hurbilketa estatistikoa, ipar globaleko torturaren errealitatea ezagutaraziz.
