'Karpeta urdinak', sarrera agortuak, eta 'Calma!'
Ostiral, larunbat eta igandean, Gezala Auditoriumak bi antzerki obra eta ikus-entzunezko bat jasoko ditu. Igandean, Max saridun bat herrian.
Guillem Albaren 'Calma!', igandean Gezalan. Argazkia: Guillem Alba. Oparo dator Lezoko kultur asteburua. Herriko ekitaldi nagusiena Lezo-Jaizkibel mendiko lasterketa (igandean, 10:00etan) izango bada ere, kiroletik at badira Gezala Auditoriumeko goxotasunean gozatzeko moduko jarduerak.
Lehena bihar da. Lezoko Zinema Ttikiaren barruan, Karpeta urdinak dokumentalaren emanaldia jasoko du herriko kultur areto nagusiak, 19:00etan.
Bigarrena bihar, baina sarrerarik ez dutenentzat, kale. Izan ere, Tuppersex antzezlana taularatuko du Urrup Antzerkia konpainiak. Hasierako orduan, 19:30ean, sarreren jabeek bakarrik egon ahalko dute, agortu egin baitira tiketak.
Igandean berriz, Max saridun antzerkia. Guillem Albak Calma! obra taularatuko du Gezalan (19:30). Lana ikusteko sarrerak gelditzen dira oraindik. Horiek eskuratzeko (8 euroan) klik egin hemen.
Honakoa da lanaren sinopsia:
Guillem Albak, bakarrik eta hitzik gabe, hain gertakari konplexu eta aldi berean hain eguneroko bat kontatzen digu: presa. Bizi garen “denbora guztian korrika” hori.
Calma! ikuslea esperientzia komiko batez gozatzera eramaten du, une poetikoez. Clown-a banderatzat hartuta, eta txotxongiloen, keinuen, itzalen edo musikaren bidez, gure egunerokotasuna eta bizi-bidaia bera zalantzan jarriko ditugu. Hainbeste korrika egitea merezi duen, benetan betetzen gaituena egiten ari garen eta, azken batean, horrela jarraitu nahi dugun edo aldatu nahi dugun.
Calma Guillem Alba hutsa da. Bere clown basatia presente dago, bere poetika ez da falta, eta bere mezu baikor eta bizia, azkenik, katartiko bihurtzen da.
2022ko Max saria lortu zuen Albak, eszena zuzendari onenaren atalean, Irene Sola idazlearen Canto jo i la muntanya balla eleberriaren antzerkiko bertsioagatik. Orain, bakarkako lanean ari da Calma! aurkezten.
