Sare morea, indartsu
Egitarau zabala eta askotarikoa antolatu dute talde feministek, hainbat eragilek eta udalak batera, Martxoaren 8aren harira.
Martxoak 8ko egitaraua aurkeztu dute. Urteroko hitzorduari hutsik egin gabe, agerraldia egin dute gaur arratsaldean talde feministek, hainbat eragilek, Berdintasun Kontseiluak eta Errenteriako Udalak. Irribarre morea soinean, egitarau zabal eta askotarikoa aurkeztu dute Emakumeen Etxean Martxoaren 8aren harira. Itziar Ostolaza Berdintasun zinegotziak hartu du hitza antolatutakoen berri emateko, eta aurten, enegarrenez, egitarau “askotarikoa, zabala eta eragile askoren parte hartzearekin” osatu dutela jakinarazi du.
Guztiei eman dizkie eskerrak Ostolazak, izan ere horien guztien “aleak” ahalbidetzen baitu egitarau bateratu eta zabala osatzea urtez urte.
Egitarauaren barruan, denetariko ekintzak hilabete osorako: Batukada feminista, hitzaldiak, emakumeen bazkaria, antzerkia, Mariasun Landa Sari Banaketa, txistularien kontzertua, zine emanaldiak, dokuforuma, eta manifestazioa.
Ostolazak Mariasun Landa lehiaketaren sari banaketari erreparatu dio gaurko aurkezpenean: “Aurtengoa, hamahirugarren aldia du lehiaketak eta Saioa Aizpurua Arribari buruz idatzitako lana izan da irabazlea”. Beste bi ekitaldi bat ere izan du hizpide Berdintasun ordezkariak, “pandemiaren ostean, auzo elkartetako emakume taldeen lanari esker, bazkaria egingo dugu Merkatuzarreko Jose Luis Caso aretoan martxoaren 8an bertan, gure buruak zaintzeko, ongi pasatzeko elkarrekin, eta emakumeen arteko sareak eraikitzeko. Izan ere, Martxoaren 8aren helburuetako bat gure eskubideak aldarrikatzeaz gain, sareak sortu, eta elkarrekin ospatzea ere badelako”.
2020an egin zuten bazkari hori lehenengoz, eta pandemia tarteko, aurten arte ez dute berriz errepikatu. Ostolazak aurreratu du, arrakasta handia izaten ari dela dagoeneko bazkaria.
Martxoaren 8ko ezinbesteko hitzorduari ere egin dio erreferentzia Berdintasun zinegotziak, eta mugimendu feministak antolatutako manifestazioarekin bat egin eta bertan parte hartzera deitu ditu herritar guztiak. Zumarditik abiatuko da manifestazio hori 19:00etan.
Amaitzeko hitzaldi bat ere izan du hizpide. Ez da antolatutako egitarauaren barruan bakarra, baina zalantzarik gabe, egunerokotasun betekoa da gaia. Soilik baietz da baietz legearen inguruan arituko da Maria Naredo Emakumeen Etxean martxoaren 18an, 11:00etatik aurrera. Naredo legelaria da, eta Espainiako Gobernuko Berdintasun Ministerioaren Sexu Askatasuna Bermatzeko Lege Organikoaren (LISMI) idazketa prozesuan parte hartu du. “Oso testuinguru interesgarrian” helduko dela hitzaldi hori esan du Ostolazak, “zer esan handia eman dezake”. Amalatz talde feministak antolatzen duen zine emanaldia aipatu du —hemeretzigarren aldia izango du aurtengoa— eta baita ere, Errenkoalderekin elkarlanean antolatu duten erakusketa. Herriko saltokietako erakusleihoak izango ditu agertoki Kakorratzez emakumeen arteko sareak ehuntzen erakusketak.
