Don Boscorekin lankidetza hitzarmena sinatuko du udalak
Mugikortasun Seguru eta Iraunkorrerako Prestakuntza graduko ikasleek udalean praktikak egin ahalko dituzte hitzarmenaren barruan.
Don Boscora bisita egin dute udal ordezkariek. Don Bosco Lanbide Heziketako Institutuko zuzendari Juan Carlos Lizarbek, Berrikuntza Zuzendari Jose Luis Perezek eta Mugikortasun Seguru eta Jasangarrirako Prestakuntzako irakasle zein ikasleek Lezoko Udal ordezkarien bisita jaso zuten atzo ikastetxean bertan. Jesus Mari Martiarena alkatea, Joxean Sanchez Ingurumen zinegotzia, Leire Beteta Ingurumen teknikaria, Igor Ugarte Udaltzaingoko burua eta Arkaitz Angiozar Kirol teknikaria bertaratu ziren mugikortasuna, ekologia eta hezkuntzaren gaineko gaiak jorratzeko.
Zorigaiztoko gertaera batek lotu ditu estuago Lezoko Udala eta Don Bosco Lanbide Heziketa zentroa. Izan ere, pasa den urtarrilaren 5ean auto batek emakume gazte bat harrapatu zuen Gi-636 errepidean, Gaintxurizketan. Hil egin zen emakumea, jasandako zauriengatik handik egun gutxira. Istripua Lezon izan zen, lezoarra zen hildako emakume gaztea, baita Don Boscoko ikaslea ere. Gertaeraren harira, halakoak errepikatu ez daitezen, Mugikortasun Seguru eta Iraunkorrerako Prestakuntza berritzailean ari diren irakasle eta ikasleak bete-betean ari dira Gipuzkoako Foru Aldundiari aurkeztu nahi dioten proiektu batean lanean. Helburua: mugikortasun seguruagoa eta ekologikoagoa lortzea.
Udal ordezkariek ere jaso zituzten atzoko bisitan ikasle horien proposamenak lehen eskutik, eta alkateak berak azaldu duenez, lankidetza hitzarmena sinatuko du udalak zentroarekin: “Mugikortasun Seguru eta Jasangarrirako Graduko ikasleek udalean praktikak egin ditzaten, Lezon onartutako Mugikortasun Planean jasotako ekintza batzuk martxan jartzen lagunduz”. Ingurumen zinegotziak zehaztapen handiago egin du: “Ziur gaude elkarlanean arituko garela planean jasotako ekintza batzuk gauzatzeko, hala nola, herritarrak mugikortasun gaietan sentsibilizatu eta informatzeko, edota eskola bide seguruak egiteko”.
