Igeldotik Oriora ipar martxa Urdabururekin
Hilaren 11n egingo dute ipar martxa irteera, eta interesdunek, hilaren 10era arte eman dezakete izena parte hartzeko.
Otsailean Urdaburuk antolatuta egindako ipar martxaren irudi bat. Argazkia: Urdaburu Mendizale Elkartea Ipar martxa irteera antolatu du Urdaburu Mendizale elkarteak hilaren 11n. Igeldo eta Orio lotuko dituzte irteera horretan; 10 kilometroko ibilbidea, laua, malda behera, eta dena asfaltatutako eremua 200 metro izan ezik, antolatzaileek zehaztu dutenez.
Autobusez egingo dute joanaldia eta trenean itzulera. Bi topagune daude irteerarako: Lehena, Iztietako autobus geltokia. Bertan elkartuko dira 09:00etan—autobusa 09:04ean abiatuko da—; bigarrena, Donostiako Okendo 18 autobus geltokia. 09:30ean egin dute hitzordua bertan —autobusa09:35ean abiatuko da—. Autobus aldaketa egin behar dutenez, ez direla inoren zain izango azaldu dute antolatzaileek, eta ordutegia errespetatzeko eskatu parte hartzaileei.
Irteeran parte hartu nahi dutenek izena eman dezakete jada. Urdabururen egoitzara jo dezakete horretarako, astearte eta ostegunetan 19:00etatik 21:00etara, edota, egun eta ordu tarte beretan 943 52 78 79 telefono zenbakira deituta. Online ere eman daiteke izena, galdetegi hau beteta.
