EH Bildu: "Mikelek askatasun hazia ereiten zuen joaten zen lekuan"
Herriko bilkideek dolumin mezua zabaldu dute sareetan. Haren "indarra, ausardia eta laguntasuna" nabarmendu dituzte.
Gaur goizean hil da Mikel Martin Conde oreretarra. Horren harira, Orereta-Errenteriako EH Bilduk dolumin mezua helarazi du. Hona, hitzez hitz, haiek esandakoak:
“Mikel Martin Conde ortzadarraren kolore gorria izan da bere bizitza osoan. Koloretsua, borrokalaria, alaia, kantaria eta, batez ere, solidarioa. Mundu berdinzale, justua, lumarik ederrenekin jantzia, irribarretsua eta kantuzalea maite zuen. Eta horren alde ekin izan zuen beti. Galtzarabordatik Bilboraino, eta buelta. Euskararen maitale sutsua eta nekagaitza. Jendarte heteronormatiboa borrokatuz. Gorrienetan gorriena. Mikelek askatasun hazia ereiten zuen joaten zen lekuan.
Orereta-Errenteriako EH Bildun ederki bizi izan dugu Mikelen indarra, ausardia eta laguntasuna. Bere gorputzak utzi gaituen honetan, bere oroimenak dirau gure artean. Mikelen izenak eta izanak gure oroimenean iraungo du zutik.
Bere familiari eta gertukoei gure doluminak eta elkartasuna azaldu nahi diegu.
Orereta-Errenteria eta Euskal Herria hobeago bat egiteko bidean Mikel burkidea beti lagun”.
