Jesus Mari Martiarena, EAJren alkategai
"Lezoren alde lanean jarraitzeko prest naiz", adierazi du EAJko kideak. Lezoarren laguntza eta konfiantza eskatu ditu.
EAJk badu hautagaia maiatzaren 28ko udal hauteskundeetarako: Jesus Mari Martiarena. Hala erabaki du Lezoko Uri Buru batzarrak. Egun Lezoko alkate da Martiarena, eta 2015-2019 agintaldian hartu zuen lehenengoz udalaren gidaritza, 2016ko apirilaren 4an hain zuzen ere, Kepa Garbizu ordezkatuz. 2015aren aurretik zinegotzi izandakoa da aldi berean. Beraz, azken zazpi urteetan izan da Lezoko alkate EAJko kidea, azken agintaldian (2019-2023) PSE-EErekin egindako akordioari esker.
Izendapenagatik pozik da Martiarena. “Lezoren alde lanean jarraitzeko prest naiz. Asko egin dugu, baina asko dugu egiteko. Zuen konfiantzari esker, alkatetza eta udaletik Lezo hobe bat eraikitzen ari gara, herri irekia, bere herritarrentzat ongizatea eta aukerak bilatzen dituena”, azaldu du.
Alkate bezala udalean egindako kudeaketari errepasoa egiteko aukerarik ez du galdu zerrendaburu izango denak: “Gure kudeaketarekin, udala zor-egoera batetik kontuak saneatua izatera igaro da, eta aldi berean, zerbitzu hobeak garatu eta Lezorentzat eta herritarrentzako inbertsioak egin ditugu. Hori guztia, zergak eta udal-tasak igo gabe, desgrabazioak eta zerga-onurak eskainiz tokiko ekonomia indartzeko eta aldi berean inbertsioak eginez familien eta kolektibo kalteberarentzako arreta hobetzeko”.
Lezo “hurbiltasunez, gardentasunez eta zintzotasunez, eta parte hartzea sustatuz” gidatzeko konpromisoa bere egin du alkategaiak, “Lezoren zerbitzura eta herria osatzen dugun emakume eta gizonen zerbitzura”. Lezo “bide onetik aurrera” doala ziurtatu du Martiarenak, eta horri eustea da haren asmoa, “baina horretarako lezoarren laguntza eta konfiantza behar dugu”.
