Euskal Ligako finala jomugan du EPLEk
EPLEko Yorel eta Ruben Mungiako Danak bat taldeko pilotariak izango dituzte aurrez aurre larunbatean Agustina Otaola pilotalekuan.
Ruben eta Yorel partida batean. Argazkia: Arizmendi EPLEko pilotariek hitzordu garrantzitsua dute larunbatean etxean bertan. Izan ere, Euskal Ligako Ohorezko Mailako Larruzko Paletako finalera heltzeko txartela izango dute jokoan. EPLEko Yorel eta Ruben Mungiako Danak Bat elkarteko pilotarien kontra ariko dira Agustina Otaola pilotalekuan 11:30ean hasita. Sasoi onean dago pilotari bikotea, multzoko lehen postuan sailkatu dira, eta finalera iristeko aukera paregabea dute.
Eskuz Binakako eta pala motzeko modalitateetan ere, finalerdietan sartzeko zorian izan dira EPLEko pilotariak, baina ez dute lortu azkenean, garaipen baten faltan.
Finalera heldu den beste pilotaria Taberna izan da Eskuz Banakako trinketean. Joan den ostiralean jokatutako partidan lortu zuen txartela partida gogorra 36-40 irabazita.
EPLEko Aranburu eta Chiapuso, gainera, Lehehengo Mailari eusteko lehian arituko dira, eta Azpirozek, berriz, Bigarren Mailako final erdia jokatuko du.
