Eskriturak sinatuta, orain bai: Luzuriaga pasaitarrena da
Eraberritze proiektua uda baino lehen lizitatzea aurreikusi du udal gobernuak. Bizilagunak zoriondu ditu EH Bilduk "denon" lorpenagatik.
Akordioa sinatzeko unea. 
Atzo formalizatu zuen Pasaiako Udalak Luzuriaga eraikinaren erosketa. Horretarako, fabrikaren jabetza zuten hiru aldeen ordezkariek —Gipuzkoako Foru Aldundia, Nafarroako Gobernua eta Kreditu Ofizialeko Institutua— bat egin zuten akordioa sinatzeko. “Gaurko sinadurarekin, antxotarren desira bat gauzatzen ari gara”, poztu zen Izaskun Gomez.
EH Bilduk Madrilen adostutako 6 milioietako 2,6 —tasazioak zehazturiko zenbatekoa— inbertitu ditu udalak higiezinaren erosketan; iragan abenduan jaso zuen transferentzia udalak. Fabrika zaharra ez ezik, Pabinsako lurrak eta Luzuriagaren atzealdekoak ere bereganatu ditu udalak [lur berriei buruzko xehetasun gehiago irakur daitezke honako erreportaje honetan].
Gainontzeko 3,4 milioiak azpiegitura birgaitu eta egokitzeko lanetan inbertituko ditu udalak. Gobernuaren asmoa da Antxoko eraikin horretan gizarte- eta kultura-gune handi bat sortzea, alkateak aitortu duenez. Eraberritze proiektua uda baino lehen lizitatzea aurreikusi dute; plan hori zer-nolakoa izango den Conexiones Improbables enpresak gidaturiko entzute saioetan parte hartu zutenei aurkeztu zieten orain dela aste batzuk, bilera itxi batean.
Udalburuak aurreratu duenez, 80 urte eta 5.000 metro koadro inguruko azalera dituen eraikinean kultugune berria sortu nahi dute. Bertan kokatu nahi ditu udalak barrutiko kultur- eta gizarte-eragileen jarduerak, eta baita zenbait udal zerbitzu ere.
Izaskun Gomez eskertuta agertu da Espainiako Gobernuarekin, finantziazioagatik, eta inplikatutako beste aldeei ere zuzendu zaie: “Gurekin uneoro lankidetzan aritu den Kreditu Ofizialeko Institutuaren inplikaziorik gabe, gaurko ekitaldi hau ezinezkoa izango zatekeen. Ez ditut ahaztu nahi, ezta ere, Nafarroako Gobernuaren jarrera ona, eta jakina, Gipuzkoako Foru Aldundiaren lankidetza eskuzabala, zehazki, Rafaela Romerok zuzentzen duen departamentuarena”.
EH Bilduren adierazpenak
Pasaiako EH Bilduk hedabide honetara jo du berriaren gaineko balorazioa egin asmoz: “EH Bilduk Madilen lortutako akordioari esker, Luzuriaga eraikina erosi du Pasaiako Udalak. Lerro hauen bidez Antxoko herritarrak eta eragileak zoriondu nahi ditugu, lorpen hau denona da. Zorionak!”.
