Gaurtik aurrera eska daiteke obra txikiak egiteko 'lizentzia espresa'
Ordenantza berriari esker, pasaitarrek euren etxeetan obrak egiteko baimenak eskuratzeko prozesua arinduko dela ziurtatu du Loreto Osak.
Nork bere etxean obrak egin ahalko ditu behin horien berri emanda. 
Obra txikietarako lizentzia eskatu behar duten pasaitarrek gaurtik aurrera edukiko dute hori egiteko aukera, lizentzia espres deitu duten arau berriari atxikita. Horri esker nork bere etxean egin behar dituen lanen baimenak eskatzeko prozesua arinduko da.
Atzo argitaratu zen neurria Gipuzkoako Aldizkari Ofizialean, eta beraz, gaurtik aurrera indarrean da. Loreto Osa Hirigintza zinegotziak ziurtatu duenez, eragina izango du lizentziak pasaitarren egunerokoan: “Araudi horrek erraztu egiten die herritarrei beren etxebizitzetan obra txikiagoak egitea. Orain arte, obra guztiek lizentzia egokia izan behar zuten, baina ordenantza honen bidez izapide hori arindu nahi dugu higiezinaren egiturari eta funtsezko elementuei eragiten ez dieten obra guztietarako”.
Horrela, eskaera aurkeztean, sarrera zigilatu ondoren, komunikatutzat joko da obra eta beraz, lanekin hasi ahalko dira eskatzaileak. Ordenantzak honako lanak barnebiltzen ditu, besteak beste: etxe barruko espazioen banaketak; egiturazko elementuei, ur- eta gas-kanalizazioei edo kanpoko fatxadei eragiten ez dieten etxebizitzak eta lokalak barrutik eraberritzeko obrak; kanpoko ateak eta leihoak ordezkatzea; edota fatxada edo estalkia erortzeko arriskua duten elementuak kentzea.
