[Galeria] Inoiz baino konplizeago, inoiz baino moreago
Borroka artikulatu bat planteatu dute gaurtik aurrera greba feminista orokor baterantz. Bide horretan, saretzera, ez isiltzera, autodefentsara, barne indarra ateratzera, planto egitera, bizitza erdigunera eramatera deitu dituzte emakumeak.
Martxoak 8ko manifestazio amaiera Errenteria-Oreretako Herriko plazan. Inoiz baino moreago, inoiz baino konplizeago behar dute emakumeek atzera buelta ez duen urratsa egin dutelako gaurtik hasita: borroka artikulatu bat planteatu dute gaurtik aurrera greba feminista orokor baterantz. Bide horretan, saretzera, ez isiltzera, autodefentsara, barne indarra ateratzera, planto egitera, bizitza erdigunera eramatera deitu dituzte emakumeak.
Ehunka izan dira Oreretako Asanblada Feministak deituta kalera atera diren herritarrak, adin guztietakoak. Zumarditik abiatu da manifestazioa Bizitza erdigunera, Zaintza sistema irauli leloa zuen pankartak zabaldu du martxa, hamaika bandera morek jarraituta. Horren atzean, Sanmarkoseneko zaharren egoitzako langileen pankarta, lan baldintza duinen alde borrokan ari direla gogoratu eta zaintzaileak zaindu beharra ezinbestekoa dela zaintza duin bat bermatzeko nabarmentzen. Bat egin du mugimendu feministak emakume horien borrokarekin. Enfermeriako pertsonal falta, auxiliarren lan karga eta ardura handitu dela salatu dute langileek, baita kontratu prekarioak dituztela lanaldi laburrekin ere. Garbiketa zerbitzuaren subrogazioa borrokarako beste arrazoia bilakatu da Sanmarkosenekoentzat, oporren gestio eskasa, edota erabiltzaile eta langileen beharrei muzin egitea bezala.
Borroka feministaren aldeko oihuak eta askotariko musika tartekatuta egin du ibilbidea manifestazioak. Alabergako biribilgunean, Zirika gazte mugimenduko kideak zituen zain martxak; bengalekin egin diote harrera bildutako neska gazteek. Beste hainbeste gertatuta da Biteri kalean. Justizia feminista aldarrikatu dute pankartaren atzean zeuden mugimendu feministako kideak.
Herriko plazan amaitu da manifestazioa. Txalapartak egin dio harrera, luze, jendetsua izan delako gaurkoa oso. Asanblada feministako kideen lehen hitzak, urte luzeetan konplize izan duten Mikel Martin Conderentzat izan dira eta txalo zaparrada batekin erantzun dute bildutakoek:”Gure omenaldia zuretzat da gaur Mikel”.
Sistema eztandarazteko hamaika arrazoi dituztela egunerokotasunean salatu dute ozen. Testuinguru horretan kokatu dute, herrian bertan, espazio publikoen garbiketan ari diren emakumeen borroka. Pandemiari ere begiratu diote, izan ere, bi urte direla normaltasunera itzuli nahian baina emakumeentzat normaltasuna, “gerra etengabea” dela esan dute. Datu bat, gordina: 25 eta 64 urte arteko Hego Euskal Herriko biztanleriaren %53,52 egoera prekarioan aurkitzen da, lan duinik gabe, eta diru sarrera eskasekin. “Emakumeen langabezia egiturazkoa izaten jarraitzen du. Pandemiak hondoratzen ari zen sistema baten josturak agerian utzi zituen, eta ustezko normaltasunak berretsi ditu: zaintza lanak emakumeon bizkar daude, maiz esplotazio eta prekarietate egoeran egiten dira, eta negozio bilakatu dira”, salatu dute.
Beste datu bat ere eman du mugimendu feministak: “2018an Araba, Bizkai eta Gipuzkoan ordaindu gabeko lanen balioa Barne Produktu Gordinaren %27,7a zen, sistemak 21.296 milioiko dirutza aurreztu zuen eta lan horien %67,2 emakumeok egin genituen, maitasunaren izenean. Gaizki ulertutako maitasuna”. Normaltasunak egiturazko pobrezia eta prekarietatea direla gaineratu dute, “eta emakume izena du”.
“Emakumeen itolarrian” oinarritutako sistematik askatzeko bide bakarra feminismoa dela aldarrikatu dute halaber, “feminismoak bizi dugun sistema iraultzeko proposamen politiko, kultural, eta ekonomikoa ekarri du mahai gainera, gure bizitzak erdigunean jartzen dituen bake eta justizia bidea, gure bizitza duinduko duen bide bakarra”.
Denon bizitzak erdigunean
Gaurtik abiatu duten prozesuak Denon Bizitzak Erdigunean du izena, eta herriz herri, auzoz auzo antolatzea ekarriko du, “eta gaurtik aurrera, aliantzak eta proposamenak bateratuko ditugu herri mugimenduekin eta eragile soziosindikalekin, aldarrikapen agenda bat sortuz”. Irrintziak, more koloreko bengalak eta Zutik emakumeak kantaren doinuekin amaitu da gaurko mobilizazioa. Ortzimugan, greba feminista orokorra; bidean, konplizitate eta sare ugari josteko lana. Hasi dira, eta gaur, inoiz baino konplizeago, inoiz baino moreago irten dira kalera etorkizuna feminista izan dadin.
