Portuko ur sarea konpontzeko Euskadi etorbidea moztuko dute
Hasierako aurreikuspenen arabera, hilaren 14tik 16ko gauera arte ibilgailuek ezingo dute Trintxerpeko kale nagusia erabili.
Ziritzako bertakoen aparkalekurako sarbidea portu eremutik egin beharko dute ibilgailuek mozketak dirauen artean. 
Pasaiako Portu Agintaritzak edateko ura banatzeko sarean egin behar dituen konponketa lanak direla eta, Trintxerpeko Euskadi etorbidea erabat moztuko dute datorren asteko asteartean, hilak 14, 09:00etatik lanak bukatu arte —hilaren 16ko gauean aurreikusi dute izango dela hori—.
Udaltzaingoak jakinarazi duenez, portuak adierazi du “beharrezkoa” dela mozketa horiek egitea portu-sarea behar bezala konpondu ahal izateko, baina agenteek aitortu dute obrak hasi ondoren ikusten badute “ez dela beharrezkoa erabat moztea”, eta kalea partzialki moztea nahikoa bada, seinaleak kendu eta berehala emango dutela aldaketaren berri.
Euskadi etorbidea guztiz moztuz gero, zamalanetarako sarbidea baimenduko da Correosetik, eta Ziritzako bertakoen aparkalekurako sarbidea portu eremutik egingo dute ibilgailuek. Arduraz jokatzea galdegin du Pasaiako Udaltzaingoak: “Nahiz eta mozketa horiek ez diren udal arrazoiengatik egiten, baizik eta PPAk egin behar dituen konponketengatik, ahalik eta eragozpen gutxien sor daitezen, eskertuko genuke Udaltzaingoak ezartzen dituen jarraibideak betetzea”.
