Udako Oporrak programan online izena emateko epea bihar zabalduko dute
Izena emate presentziala hilaren 20an hasiko da, eta aurretik ordua hartu beharko da.
Udako Oporrak programa aurkeztu dute. Argazkia: Herri Bizia Udako oporrak programan izena emateko epea bihar zabalduko du udalak. Online egiteko aukera izango da bihar hasiko dena, izan ere, modu presentzialean izena emateko hilaren 2oan zabalduko baitu epea udalak, eta gainera, aurretik, hitzordua hartu beharko da.
Izapide guztia webgune honetatik egitea aholkatu dute.
Udako aisialdi hezitzailearen eskaintza osatzen duten jardueretan izena eman ahalko dute Errenteria-Oreretan erroldatuta dauden haurrek, edota bertako ikastetxe batean ikasten dutenek.
Aurrez aurreko izena emateko epea hilaren 20tik 31ra, biak barne, Zu! zerbitzuan egin dezakete. Horretarako, webgunearen bidez beharrezko inprimakia deskargatu daiteke eta eskatzen den dokumentazioarekin batera aurkeztu. Aurrez aurre izena emateko, ezinbestekoa da hilaren 15etik aurrera hitzordua hartzea 943 44 96 00 edo 010 telefono zenbakietan.
Ikasturtean bezala, udan ere, aisialdi hezitzailearen aldeko apustua egin duela udalak azaldu zuten aurkezpenean, Xabier Sanchez Gazteria zinegotziak, Ibai Narbarte Udako Oporrak programaren koordinatzaileak, eta Bea Martin Gazteria dinamizatzaileak, “helburu nagusia balioetan eta eskubideetan heztea da, parekidetasuna, parte hartzea, inklusioa edo euskara sustatuta”.
906 plaza orotara
Eskaintzaren barruan 906 plaza daude banatuta programetan. 2017-2019 jaiotako haurrei zuzendutako Txikiak programan eta 2013-2016 jaiotakoentzako Handiak programan izena eman nahi dutenek bi txandetako batean eman dezakete izena, ekainaren 27tik uztailaren 7ra, edo uztailaren 10etik 21era.
Hiru elkargune izango dira, halaber: Agustinak, Beraun, eta Erdigunean. Adin tarte horiei begira 760 plaza eskainiko ditu udalak bi txandetan. Aurreko urteko prezio berak mantendu dituela udalak ere jakinarazi zuten agerraldian. Hala, txikiak programan parte hartzeko 42,10 euro ordaindu beharko dituzte, eta Handiak programan berriz, 52,60 euro.
Errenteabentura programak iaz izandako arrakastaren ondoren, aurten errepikatu egingo dute. 2010-2012 urteen artean jaiotako haurrei begirakoa da eskaintza, eta goiz eta arratsaldez, zein egun osoz hainbat jarduera izango dituzte parte hartzaileek. Txanda bakarra du programak uztailaren 3tik 14ra eta 96 prestonentzako lekua du. Prezioa, 63 eurokoa da.
Azken programa, 2007-2009 urteen artean jaiotako haurrei begirakoa da: Kanpabentura. Aste eta erdi igaroko dute Beireko (Nafarroa) aterpetxean parte hartzaileek utzailaren 10etik 19ra. Jardueraren prezioa 210,30 eurokoa da eta 50 lagunentzako tokia izango da.
Behar zehatzak dituzten parte hartzaileei laguntzeko langile kualifikatuak izango dira.
Programetan izena emateko garaian ez da ordaindu beharko, izan ere, gaitasun araberako tarifak egokituko ditu udalak. Zenbateko hori kalkulatzeko izena emateko orria betetzerakoan egin beharko da eskaera. Informazio guztia webgune honetan kontsulta daiteke, eta zalantzak argitzeko posta elektronikora mezua bidali edo 943 44 96 06 telefono zenbakira deitu daiteke.
