[Argazki galeria] Lehen arretaren egoera irmo salatu dute
Lehen arretaren egoera "kezkagarria" salatzeko kalera irten dira gaur herritarrak. Hitzaldi, manifestazio eta elkarretaratze bat egin dituzte euren aldarriak helarazteko.
Lehen Arreta Arnasberritzen, Donostialdea Osasun Publikoaren Alde eta Olatu Txuria elkarteek antolatuta, lehen arretaren egoera “kezkagarria” salatzeko kalera irten dira gaur herritarrak. Lehenik eta behin ‘Lehen arretarik gabe zer galduko dugu?’ hitzaldia egin dute 11:00etan Reina Aretoan, eta bilkura hori bukatuta, manifestazioari ekin diote bertaratutakoek. Herriko kaleak gurutzatuta, Iztetako Osasun Zentroaren aurrean bukatu dute mobilizazioa, bertan elkarretaratzeko.
Antolatzaileek salatu dute lehen arretaren egoera “kezkagarria” dela eta profesional faltagatik eta beste hainbat arrazoirengatik egungo egoera beste urteetakoa baino “askoz okerragoa” dela. Lehen arretaren egoera “etengabe okertuz” joan dela adierazi dute, eta “epe motz, ertain eta luzera” konponbiderik ez dagoela esan dute atsekabez.
Profesionalek jakinarazi dute osasun zentroetan “etengabeko autoorganizazio” saiakerak egin badituzte ere, “presio asistentzialarekin” jarraitzen dutela, eta euren lana “pazienteen eta profesionalen segurtasuneko baldintzak bermatu gabe” egin behar dutela.
“Kezka, neke, estres, etsipen, haserre eta eraso gehiago eta aurrekontu, langile egonkortasun, pertsonal eta Osakidetzan garrantzia gutxiago”. Hori da, egun, profesionalek jasan behar duten egoera.
