Martxoa, Touringeko emakumeen hilabetea
Martxoa emakumeen hilabetea izango dela jakinarazi du Touringek, eta gaur emakumeen ordezkaritza bat omenduko dute gizonen lehen taldearen partidaren atsedenaldian.
Argazkia: Touring KE. Touring Kirol Elkarteak buru-belarri jarraitzen du mendeurreneko ospakizunekin, eta martxoa emakumeen hilabetea izango dela iragarri du klubak. Asteartean Realeko nesken lehen taldeak Fanderian entrenatu zuen, eta gaur, gizonen talde nagusiaren partidaren atsedenaldian, klubeko emakumeak omenduko dituzte.
1960 eta 1970eko hamarkadetan, Touringek futboleko eta eskubaloiko taldeak izan zituela gogorarazi du klubak, baina gaur egungo emakumeen arloak 2001. urtean hasi zuen bere ibilbidea, 15 emakumerekin. 22 urte geroago, 150 emakume inguru iritsi dira lehen taldera. Emakume horien ordezkaritza batek jasoko du gaur omenaldia.
Harmailak betetzeko aldarria
Touringeko gizonen lehen taldea maila mantentzeko lehian dago. Zazpi partida falta dira Hirugarren Mailako Liga bukatzeko, eta horietatik hiru Fanderian jokatuko dituzte gorritxoek. Neurketa horiek duten garrantziagatik, Fanderiako harmailak betetzera deitu du klubak, eta etxean jokatuko diren hiru partidetan zelaia betetzeko helburuarekin, bazkide bakoitzak lagun bat gonbidatu ahal izango duela jakinarazi du Touringek. Lehen norgehiagoka gaur da, eta aurkari zuzena den Paduraren aurka jokatuko dute, 16:30ean.
