600dik gora lagun irten dira kalera 'hilmugak' salatzera
Asilo eta migrazio politikek eragiten duten mugetako indarkeria salatzeko kaleak hartu dituzte ehunka bizilagunek, Trintxerpetik Donostiara.
Trintxerpeko Azokatik abiatu zen mobililizazioa igande eguerdian. [Argazkia: OEE Gipuzkoa]. 
Bihar, hilak 21, Arrazagatiko Diskriminazioa Ezabatzearen Aldeko Nazioarteko Eguna aldarrikatuko da. Data horren kariaz, atzo, igandearekin, 600dik gora lagun batu zituen Trintxerpetik Donostiara deituriko xenofobia eta arrazakeriaren kontrako martxak.
SOS Arrazakeria Gipuzkoak, Medicusmundi Gipuzkoak eta Euskadiko GGKE Koordinakundeak antolatutako manifestazioak Hilmugak izan zuen lelo nagusi, egungo asilo eta migrazio politikek eragiten duten mugetako indarkeria salatu asmoz. Orotara 48 erakundek egin zuten bat saiakerarekin, eta 659 pertsona zenbatu zituzten mobilizazioan.
46.622 da mundu osoko mugetan hildako pertsonen kopurua, Migrazioen Nazioarteko Erakundeak 2004tik 2022ra jasotako datuen arabera. “Heriotza dokumentatuez ari gara soilik”, zehaztu zuten martxa babestu zuten erakundeek, “eta horrek benetako zifra are handiagoa dela ziurtatzen du. Eta non dago muga? Zenbat gehiago beharko dira neurriak hartzen hasteko?”.
Antolatzaileek aldarrikatu zuten “gaur inoiz baino beharrezkoagoa” dela honako hauek erreklamatzea: “asilo-eskubidea betetzea; gure lurraldean aurkitzen diren migratzaileen erregularizazioa ahalbidetzea; eta benetako harrera politikak aplikatzea. Mugetako indarkeriaren aurka pausoak eman ditzagun, gaur egungo hilmugak itxaropen helmuga bihur daitezen!”.
