Oarsoaldeko ontziak, bikain, Gipuzkoako Batel Ligako zazpigarrenean
San Juango Gazte Mailako arraunlariak irabazle izan dira neska zein mutiletan; San Pedrok garaipena lortu du berriz, Haur Mailako Mutiletan. Hibaika ere fin aritu da lanean.
Hainbat ontzi Orion, Gipuzkoako Batel Ligako zazpigarren jardunaldian. Argazkia: Hibaika Oarsoaldeko batelak uretara itzuli dira hilabete luzeko etenaren ostean. Otsailaren 11n izan zuen seigarren jardunaldia Gipuzkoako Batel Ligak, eta atzo egin zuten zazpigarrena, azkenetik ia hilabete eta erdira. Getarian zen jokatzekoa zazpigarren jardunaldi hori, baina itsaso txarrak horretarako aukera emango ez zuela aurreikusita, Orioko urek hartu zuten Zarauzko arraun Elkartearen eskutik estropada.
Haur Mailan oso txukun arraunlariak, oro har. Nesketan, Hibaika B ontziak egin zuen Oarsoaldekoen artetik denborarik onena —laugarren sailkatu ziren eta 13 puntu lortu— Tolosaldea A, Hernani A eta Zumaia A ontzien atzetik, irabazleengandik zortzi segundora. Bikain ari dira errenteriarrak. San Pedro A ontzia, bosgarren sailkatu zen eta 12 puntu jaso. San Pedro B ontzia, berriz, bederatzigarren sailkatu zen, eta haren atzetik, hamargarren Hibaika A ontzia. San Juanen ontzia izan zen sailkatzen azkena kategoria horretan.
Haur Mutiletan San Pedro A-rentzat garaipena. Bikain ari da arraun elkartea harrobiarekin emaitzei erreparatuta, San Pedrok lehiara ateratako bigarren ontzia ere hirugarren sailkatu zen atzoko proban, Zumaiaren atzetik. Hibaikako mutilak ondoren, laugarren postuan; Etxetxo ontziko eskifaia ere oso fin lanean, laugarren postu horri eusten. San Juanen talde mistoa bosgarren sailkatu zen kategoria berean, eta Illunberen ontzia, atzoko lehian aritu zen bakarra, deskalifikatuta gelditu zen estatxarekin izandako arazoen ondorioz.
Promesa nesketan San Juan A ontzia izan zen bailarako lehena; laugarren postua egin zuen, estropada irabazi zuen Hernanitik sei segundora. Hibaika B ontzia zortzigarren sailkatu zen, eta San Pedro A, bederatzigarren. Hibaika A ontzia hamalaugarren izan zen, eta San Pedro B, hemeretzigarren.
Promesa mutiletan San Juan A ontzia hirugarren izan zen, irabazlea izan zen Orio A-tik sei segundo eskasera. San Pedro A laugarren sailkatu zen, bederatzigarren San Pedro B, eta hamargarren Hibaika.
Gazte Mailako Neska zein Mutiletan San Juango arraunlariak izan ziren garaile atzoko estropadan. Lan bikaina arraunlariena. Hibaika hirugarren sailkatu zen nesketan. Mutiletan, berriz, San Pedro bigarren, eta Hibaika bosgarren.
Azkenik, absolutuetan San Pedro hirugarren sailkatu zen, Donostiarra eta Ur Jokoren atzetik, eta San Juan A eta San Juan C laugarren eta seigarren, hurrenez hurren.
Zumaia eta Urdazuri
Datorren asteburuan hitzordu bikoitza izango dute arraunlariek. Larunbatean jokatu da zortzigarren jardunaldia Zumaian. 17:00etan izango da estropada. Bederatzigarren jardunaldia, berriz, igandean izango da (ordua zehazteke da oraindik) Urdazurin (Donibane Lohizune).
Atzoko estropadaren emaitza eta denborak, lotura honetan kontsulta daitezke.
