[Argazki galeria] Egoitza berria du Trintxer Kulturalak
Trintxerpeko lokal zaharberritua inauguratu dute gaur goizean elkarteko eta udaleko kideek. 'Ulia kultura' izena jarri diote.
Harrerakoaz gain, bereizitako beste bi gela ditu Ulia kulturak. Argazkikoa, bietan handiena. 
Gaur goizean inauguratu dute Trintxerpen kultura sustatzeko egoitza berria: Ulia kultura. Trintxer Kulturalaren egoitza —gela bakarra zen— gune desberdinetan zatitu du udalak, orotara sarrerako espazioa eta beste bi gelatxo bereiziz, bainugelaz gain.
Irekiera ekitaldian izan dira kultur elkarteko kide nahiz ordezkari politiko eta udal teknikariak. Horiei denei ongietorria eman eta mintzaldia eskaini du Izaskun Gomez alkateak: “Beti diot Pasaiako bizitza hertsiki lotuta dagoela kultur- eta gizarte-elkarteen lanarekin. Zuek denak zarete herriari bizitza eta udalean egiten dugun lanari zentzua ematen diozuenak”.
Aurten XXV. edizioa izango du Trintxer Kulturalak antolatzen duen Ikuska, Badiako Film Laburren Nazioarteko Erakustaldiak, eta hura antolatzeko azpiegitura zaharberritua izango dute gaurtik aurrera bizilagunek. Hori bakarrik ez, Kike Santiago kideak gaurkoan adierazi du beste hainbat jarduera ere antolatu nahi dituztela, eta lokal berriak aukera aski irekiko dizkiela hartarako trintxerpetarrei, eta bereziki Ulia kale inguruan —bertako 13 zenbakian dago lokala— bizi direnei.
Gomezek berretsi du, hain zuzen, Trintxerpeko goiko auzoak biziberritzeko saiakera ere badela azpiegitura berritu izanarena. Santiagok: “Inguru honetako jendeak, goiko bizilagunek, eta batez ere adinekoek, aukera izango dute orain antolatzen ditugun kultur jarduerez gozatzeko, beti behealdera jaistera behartuta egon gabe”.
Espazio berriak 100 metro koadroko azalera du. Egin dituzten obretan eta altzarietan, 70.000 euroko inbertsioa egin du Pasaiako Udalak. Arduradunek adierazi dutenez, laster, hala nahi dutenek Ulia kulturako espazioak erreserbatu ahal izango dituzte HAZ bulegoen bidez, eta erreserba-egutegia publikoa izango da webgunean. Alegia, Pasaiako beste espazio kulturalen funtzionamendu bera aplikatuko zaio.
