Gaztaño Palestina bihurtzeko lanean hasi da jai batzordea
Jaien datak eta gaia zehaztuta, aurtengo kamiseta lehiaketa martxan jarri dute dagoeneko jai batzordeko kideek.
Gaztañoko jaietako kamiseta lehiaketa martxan. Gaztañoko jaiek badute data dagoeneko: ekainaren 16,17, 18 eta 23an egingo dituzte. Denbora falta bada ere, dagoeneko inurri lanean hasi da jai batzordea Gaztaño Palestina bihurtzeko jaiek irauten duten bitartean. Urtero gai bat aukeratzen dute jaien testuinguru barruan, eta aurten, Palestinari egingo diote keinu gaztañoarrek.
Jaien datak eta gaia zehaztuta, aurtengo kamiseta lehiaketa martxan jarri dute dagoeneko jai batzordeko kideek. Lehiaketan parte hartu nahi dutenek, Palestina hartu beharko dute oinarri, eta Gaztañoko jaietako protagonista den Maritxu sorginak ere azaldu beharko du kamisetarako sortzen duten marrazkian.
Lanak aurkezteko epemuga, apirilaren 10a da.
Parte hartzaileek Auzoko lokaleko postontzira bidali beharko dituzte lanak egilearen kontaktu datuekin batera edo jai batzordeko kideekin harremanetan jarri posta elektronikora mezua bidalita. Lehiaketa irekia da parte hartu nahi duen ororentzat.
Jai batzordearen bilera
Jai batzordeak, bilerak egiten hasia dela jakinarazi du, bestalde, eta horren harira, jaien antolaketan ekarpena egin nahi duen bizilagun oro deitu du parte hartzera. Hurrengo hitzordua, hilaren 29an dute 20:00etan auzo lokalean.
