Pasaiako segada: EHUren Unesco katedraren txosten baten arabera, ez zen "ikerketa judizial eraginkorrik" egin
Hildakoen senideek orain gutxi izan dute txosten horren berri: "Nola liteke txostena hiru urtez kaxoi batean gordeta egon izana?".
Gaurko irudia, segada izan zen monolitoarena. Gaur bete dira 39 urte Espainiako Poliziak Komando Autonomo Antikapitalistetako lau kide hil zituztela Donibanen. Dionisio Aizpuru Kurro eta Pedro Mari Isart Pelitxo azpeitiarrak eta Rafael Delas Txapas eta Jose Maria Isidro Izura Pelu iruindarrak izan ziren hil zituztenak. 113 bala zulo zituzten lau gorpuek. Segadaren 39. urteurrenaren bueltan, “nobedade gazi-gozoak” dituzte Pasaian hil zituztenen senideek, hala azaldu du Pello Aizpuru Dionisio Aizpuru zenaren anaiak Azpeitiko Uztarria hedabideari.
Hilaren 3an, segadako biktimen senideek bilera izan zuten Jaurlaritzako teknikariek osatutako batzorde batekin, Uztarriak jakinarazi duenez. Batzarraren bukaeran, txosten bat eman zieten senideei. Txosten hori EHUko Unesco giza eskubideen eta botere publikoen katedrak egindakoa da, 2020ko otsailean, Eusko Jaurlaritzaren Giza Eskubide, Bizikidetza eta Lankidetzaren Idazkaritza Nagusiak eskatuta. Txostena aztertuta eta bertan azaltzen diren ondorioak irakurrita, “harrituta” eta “minduta” sentitu dira senideak: “Nola liteke txosten hau hiru urtez kaxoi batean gordeta izatea? Txostenean idatzita dauden ondorioak jakinda, nola liteke ezer ez egitea edota guri orain arte ez jakinaraztea?”. Txostenaren arabera, besteak beste, Pasaiako segadaren auzian ez zen “ikerketa judizial eraginkorrik” egon, eta zantzu ugarik seinalatzen dute “epaiketarik gabeko” hipotesia.
Senideek, larunbatean, 19:00etan hasita, Azpeitiko Azoka Plazan egingo duten ekitaldiak txostenaren inguruko beren balorazioa azalduko dutela nabarmendu du Aizpuruk. Aldi berean, hilaren 28an segadarekin lotura izan dezaketen poliziek identifikazio saio batean parte hartuko dute Donostiako Gipuzkoako Auzitegi Nagusian, hara deklaratzera joango dira; elkarretaratzea egingo dute egun horretan epaitegi horren atarian, 10:00etan hasita, Pasaiako sarraskia ikertu eta argitu lelopean.
Gaur, Donibanen, azken 38 urteetan bezala, lore sorta jarri dute hilketak izan ziren tokian dagoen monolitoan.
