Agenda 2030aren baitan, Lezoko ikasleek 'Energia eta hondakinak' aztertuko dituzte
Horixe da aurtengo hamabosgarren ikasturteko gaia. Ikastetxeetan ekoordezkariak hautatatu dituzte, eta azterketa sakona egingo dute orain.
Lezoko ikasleak Agenda 2030 egitasmoaren baitako hamabosgarren ikasturtean murgilduta daude. Aurten “Energia eta hondakinak” izan dituzte aztergai. Horren baitan, maila eta ikasgela bakoitzeko ekoordezkariak hautatu dituzte, eta orain aurtengo gaiaren inguruko azterketa sakona garatuko dute. Joxean Sanchez Ingurumen zinegotziaren arabera, “ikasleek ohitura jasangarriak izan dezaten eta ingurumen-kontzientzia hartzea, eta, aldi berean, herritarren parte-hartzea sustatzea” da eskolako Agenda 2030 egitasmoaren helburua.
2021/2022 ikasturtean Lezo Institutuko ikasleek zelaiak eta larreak aztertu zituzten Lezoko Eskolako Agenda 2030 programaren baitan. Ondoren, 2022ko ekainean antolatutako udal foroan, egindako lanaren azalpenak eta hartutako konpromisoen berri eman zieten Ingurumeneko zinegotziari eta udal teknikariari. Horrekin batera, hainbat eskaera ere luzatu zizkieten: belardien mozketa jarraia mugatzea intsektu-irla gehiago sortzeko, zuhaitzak dauden parkeetan mahaiak eta hamakak jartzea, txakurren jabeek bere maskotaren kakak jasotzeko neurriak ezartzea, herriko parke zein berdeguneetan hondakinak ez botatzeko neurriak hartzea, hiri-eremuan bertako zuhaitz eta landare espezie gehiago jartzea, etab. Orain, martxoan, berriro bildu dira Leire Beteta Ingurumeneko udal teknikariarekin, eta joan den urteko ekaineko galderei erantzuna eman die, udalaren jarduna ardatz. Aurtengo gaiaren inguruko azterketa burutu ondoren, ekaina hasiera aldera, udal ordezkariekin bilduko dira berriro ikasleak.
