Rufi Arretxeri aitortza, hunkigarria eta jendetsua
Rufi Arretxeri egindako omenaldian Pasaia KEren eta Realeko beteranoen arteko partida izan zen larunbatean.
Rufi Arretxe (erdian), Pasaia KEko kide Gorka Blanco eta Ibon Materekin batera. Bizi oso bat zuri-gorriz egin duelako, omenaldia egin zioten Rufi Arretxe antxotarrari larunbat arratsaldean Jesus Mari Zamora futbol zelaian, Don Boscon. Pasaia Kirol Elkartearen beteranoen taldea aurkezteko baliatu zuten, gainera, eguna: Realeko beteranoen kontrako partida jokatu zuten. Emaitza gutxienekoa izan zen (nabarmen galdu zuten antxotarrek), egunaren muina Arretxe omentzea izan zelako.
Partida hasierako talde argazkia, erdian (zutik) Rufi Arretxe dela
Molinao auzoan jaioa, gazte-gazte joan zen lanera Arretxe Antxora, Pasayako izeneko autoen garajera. Barrutira etortzearekin batera, Pasaia KEren hainbat sekziotan laguntzen hasi zen 66 urte beteko dituen kideak: txirrindularitza arloan, eskubaloikoan, autokros eta motokros lehien antolaketan… Ondorenean hasi zen futboleko taldean laguntzen, bertan urte luzez delegatu eta utillero izanik. Beti zegoen jokalariak laguntzeko prest, haien jokatzeko gaiak, botak batez ere, txukun-txukun mantentzeko lanean. Milaka izan dira haren eskuetatik pasatako futbol oinetakoak, takoak aldatzeko, garbitzeko, dena puntuan izateko. “Milaka izan dira landu ditudan botak”, adierazi zuen larunbateko omenaldian. “Mila esker denei!”, esan zuen.
Partida hasi aurreko omenaldian Pasaia KEren partetik banderina (beteranoen kapitain Juan Luis Crespok emana), elastikoa eta plaka jaso zituen. Realeko beteranoek ere oroigarria eman zioten, Enri Irazoki kapitain oiartzuarraren eskutik. Ohorezko agurra ere ez zen falta izan. Nola ez, ondoren, ohorezko sakea egin eta talde argazkia atera zuten lehia hasi aurretik.
Jendetza bildu zen Jesus Mari Zamoran. Denek gozatu zuten Pasaia KEren eta Realaren beteranoek egindakoarekin. Arratsalde biribila izan zen, ondoren, luntxarekin biribildu zena.
