XI. Ganbera Musika Astea, gaurtik ostiralera, Trintxerpen
Haize-instrumentuek, hari-instrumentuek eta jazz musikak bat egingo dute egunero 19:30ean izango diren emanaldietan.
Debra hirukoteak asteazkenean emango du kontzertua. 
XI. Ganbera Musika Asteak Trintxerpe hartuko aste honetan. Gaurtik ostiralera bitarte, Musikene Euskal Herriko Goi Mailako Musika ikastegiko hainbat ikasle bertaratuko dira herrira, Illunbe Musika Elkarteak antolaturiko zikloarekin bat egiteko.
Hamaikagarrena izango da aurtengo edizioa, eta urtero bezala, askotariko musika estiloek egingo dute bat Trintxerpen. Aurtengoan haize-instrumentuen, hari-instrumentuen eta jazz musikaren mihiztadurak entzun ahalko direla aurreratu dute antolatzaileek.
Berrogeita hamar urte daramatza Illunbek Pasaian musika eta hezkuntzaren arloan lanean. Bost hamarkada horietan egin duten lanaren isla izaten jarraitzen du Ganbera Musika Asteak, ikusgai izaten den kalitate eta aberastasunagatik, eta, ziurtatu dutenez, aukera oparoak eskaintzen dizkielako musikariei, “historiako konpositore guztiek” idatzi izan dituztelako ganbera-musika generorako piezak.
Emanaldi guztiak Trintxerpeko Alkateordetzako areto nagusian izango dira, 19:30ean. Gonbidapenak esteka honen bidez eskura daitezke. Horra egun bakoitzeko protagonistak:
- Gaur, astelehena. Kantu kontzertua: Saioa Goñi sopranoa, Carolina Luquin sopranoa, Alaitz Artola piano jolea eta Jon Imanol Etxabe baritonoa.
- Bihar, asteartea. Euterpe boskotea.
- Etzi, asteazkena. Debra hirukotea.
- Osteguna, hilak 30. Eneko Dieguez quarter jazz.
- Ostirala, hilak 31. Cor boskotea.
