Antxoko adinekoen zentro berrirako proiektua aurkeztu dute
Udalak zenbait argazki aurkeztu ditu Eskalantegi 51-53 zenbakietako egoitzak izango duen itxura erakusteko. Lanak ez dira oraindik lizitaziora atera.
Erabilera anitzeko gela izango denaren simulazioa. 
2022ko martxoan Pasaiako Udalak bi lokal erosi zizkion Visesari Luzuriaga inguruan, Antxoko zenbait ekipamendu bertan instalatzeko asmoz. Lehenengoa Eskalantegi kaleko 45. zenbakian dago, eta joan den astean inauguratu zuten; bertan kokatu dituzte ludoteka, Pasaia Musikal eta Azokako zenbait elkarte.
Bigarren lokala Antxoko Eskalantegi kaleko 51. eta 53. zenbakietan dago, eta adinekoei laguntzeko eguneko arreta-zentro baterako erabiliko dela aurreratu zuen erosketaren unean udalak. Eremuak 300 metro koadroko azalera erabilgarria du, eta adinekoentzako gune sozial gisa erabiliko dela berretsi dute arduradunek. “Horren helburua behar dituztenei laguntza zerbitzuak ematea izango da, haien autonomia sustatuz eta integrazioa eta gizarte-harremana sustatuz”, mintzatu da Izaskun Gomez alkatea.
Eguneko zentroak dagoeneko badu egokitze-proiektu bat, 448.563 eurokoa (BEZa barne). Obrak lizitaziora “laster” aterako direla ziurtatu dute udaleko iturriek, lokala berritu eta gunea martxan jartzeko. Ondoko irudietan ikus daitezke etorkizunean egoitzak izango duen itxuraren zenbait simulazio; oraingoz ez dute lokalaren erabilpenari buruzko beste informaziorik eman.
