[Argazki galeria] Itsasoa zaintzeko saretu dira
Gaur goizean 'Mater' ontzian aurkeztu dute Itsas Zaintza Sarea, Gipuzkoako itsas entitateen topagune berria.
Itsas Zaintza Sareko kideetako batzuk, gaur goizeko prentsaurrekoan. 
Gaur goizean Mater Ontzi Museo Ekoaktiboan aurkeztu dute itsasoaren kontserbaziorako saiakera berria: Itsas Zaintza Sarea. Elkarlanerako topagunea osatzen duten elkarte eta eragileak orotarikoak direla esan du Izaskun Suberbiola Garbizu ontziaren zuzendariak, eta hala aurkeztu ditu: “Maitasuna, pasioa, lana, aisialdia… Batzen dituzten arrazoiak desberdinak dira, baina guztiak eraldatzen dira elkarrekin borrokatzeko itsasoaren kontserbazioaren alde”.
Gipuzkoako Foru Aldundiko Ingurumen eta Obra Hidraulikoko Departamentuarekin elkarlanean sustatutako Gipuzkoako itsas entitateen sarea da gaurko ekitaldian aurkeztu dutena. Horren eginkizuna, kideetako bakoitzak itsasoari buruz duen ezagutza baliatuz, haren defentsa eta babesaren alde lan egitea.
Arraunlariak, igerilariak, piraguistak, arrantzaleak, urpekariak, artistak… batu egin dira itsasoarekin duten harreman estuak elkartuta.
Ekintza sorta abiarazi dute partaideek lanari ekiteko: alde batetik, jarraipen-fitxa bat diseinatu dute, eta horren bitartez kostaldearen egoeraren jarraipen aktiboa egin ahal izango da, uraren egoeraren berri ikuspuntu desberdinetatik eta ahalik eta aberastasun handienaz izateko. Gizartea ohitura iraunkorretan inplikatzea izango da sarearen beste helburuetako bat. Helburu horiek, betiere, itsasoaren zaintza eta defentsarako ekintzak batu eta koordinatuz.
Antolakuntzatik adierazi dutenez, sarean parte hartu nahi duenak zabalik topatuko ditu Materren ateak. “Itsasontzi berean gaude, bide argia markatzeko eta elkarrekin ekintzara pasatzeko garaia da”, Suberbiolak. Jose Ignacio Asensio Ingurumen diputatua ere hurbildu da gaurko ekitaldira. Hala mintzatu da: “Ozeanoak zaintzeko erronkan, etorkizun iraunkorrerako erronka erabakigarrian, ezinbestekoa da lankidetzan aritzea, ahaleginak batzea eta estrategia komunak zehaztea, urratsak ematen jarraitu ahal izateko”.
Hona, entitate parte hartzaileen zerrenda eta gaurkoan izan direnen argazki sorta: Taosa Igeriketa Kluba, Redymar, Orio Arraunketa Elkartea, Shelter Surf Eskola, Essus Surf Eskola, Subacuaticas Real Sociedad, aloKAYAK, Donostia San Sebastian Sailing, Pasaia Kayak, Albaola, Brai-Kantauri, Blas De Lezo LHII, Ostarte Sailing, Buceo Donosti, HondarribiaKo Klub Nautikoa, Navegavela, Amaina Sail Sebastian, Amuitz Outrigger Piraguismo Kirol Kluba, Naturgura, Begi Bistan.
