Ondarroara, salbazioaren bidea indartzeko
Jaitsiera postuak atzean uzten jarraitzeko oso partida garrantzitsua du Touringek larunbatean. Klubak hara joateko autobusak antolatu ditu.
Fanderian bezala, zaleen laguntza behar du etxetik kanpo ere Touringek. Urte hasieran oso zail zirudiena, egikaritzeko bidean da. Touring Kirol Elkartearen gizonen talde nagusiak Hirugarren Mailari eusteko bidean aurrera urrats oso nabarmenak egin ditu azken asteetan;. Adibidez, joan den larunbatean Gasteizko Aurrera taldeari 4-0 irabazi zioten Fanderian, eta hiru puntu horiekin nahiz beste taldeen tupustekoekin, liga hasieratik laztandu dituen jaitsiera postuetatik atera dira gorritxoak; hirugarren garaipena jarraian kateatu zuten horrela. Bide egokia berresteko hurrengo aukera beste Aurrera baten aurrean izango du herriko taldeak, kasu honetan Ondarroakoa (Bizkaia): larunbatean dute Bizkaiko kostaldeko herrian partida, 17:00etan.
Behetik gorakoan zelaian egindako lan txukunaren, nahiz harmailetatik jasotako babesaren bultzada izan dute errenteriarrek. Horregatik, jakina denez jokalariek euren lana ahalik eta hoberen egingo dutela, haiei indar gehiago emateko zaleentzako bidaia antolatu du Touringek larunbaterako: Ondarroa abordatzera joango dira oreretarrak, zelaian, eta eserlekuetan. Hala, partida 17:00etan bada ere, herritik harantz 15:15ean autobusak aterako dira, Fanderiatik. Autobus bat baino, bi, hiru edo lau hobe.
Autobusean Ondarroara joateko tokia Aterpe Inmobiliaria establezimenduan hartu behar da. Sarreraren eta autobusaren prezioa 15 eurokoa da; gaztetxoek bost euro ordaindu beharko dituzte, eta 18 urtetik beherakoen sarrera doan da.
Egun, Hirugarren Mailako 12. postuan da Touring, 29 punturekin. 16 taldeko multzoan, hiru azkenek galduko dute maila (liga 14-15-16 postuetan bukatuko dutenek). Zonalde bero-berotik atera arren, hurbil du infernua taldeak, 14. den Lagun Onak taldeak 27 puntu dituelako. Gainera, sailkapen nagusian beste hiru talderekin berdinduta daude gorritxoak 29na punturekin. Beraz, partida eta puntu bakoitza oso inportantea da mailari eusteko borroka horretan: liga bukatzeko, Ondarroako partida barne, lau partida falta dira.
