Oarsoaldeko lau udalek errenta aitorpena euskaraz egitera egin dute dei
2017a ez geroztik, lau udalerritan gora doa ariketa euskaraz egiten dutenen kopurua. Aurtengo saiorako, bi otordu zozkatuko dituzte herrietan.
Errenteriako, Lezoko, Oiartzungo eta Pasaiako udalek Oarsoaldeko zergadunei errenta aitorpena euskaraz egitera egin diete dei, 2022ko errenta aitortzeko epearen irekieraren harira. Apirilaren 11n irekiko da, eta herritarrek ekainaren 30era arte izango dute errenta aitortzeko epea zabalik. Bide batez, ogasunarekin harremana euskaraz egiteko deia ere egin dute udalek, administrazioaren euskalduntzearen bidean. Udalek plazaratutako datuen arabera, 2017az geroztik datuak haziz joan dira: iaz, eskualdeko 5.750 pertsonak egin zuten euskaraz ogasunaren aurrekoa. Errenterian bertakoen %10ek, Oiartzunen bertakoen % 39k, Lezon bertakoen % 22k, eta Pasaian bertakoen % 11k.
Udalek jarraitu beharreko urratsak argitu dituzte: errenta aitorpena euskaraz egiteko, Gipuzkoako Foru Ogasunetik bidalitako autolikidazio proposamena onartzeko garaian, euskaraz egin daiteke. Halaber, aitorpena internetez edo modu mekanizatuan ogasunaren bulegoetan aurrez aurre egiten denean, euskaraz hauta daiteke prozedura, edo langileari adierazi. Bestela, errenta aitorpena egiteko gestoria bat erabiltzen bada, errenta aitorpena euskaraz egin eta ogasunarekiko harremanetan euskara aukeratzeko borondatea adieraz daiteke.
Oarsoaldeko lau udalek, Oarsoaldeko Euskara Batzordearen bitartez, bi lagunentzako otordu bana zozkatuko dute herri bakoitzean, errenta aitorpena euskaraz egiten duten zergadunen artean. Zozketan parte hartzeko hiru bide izango dira aukeran: whatsapp bidez, online galdetegi hau beteta, edo eremu publikoan eskuragarri jarriko diren boletoak betez eta entregatuz.
