Podemosek egoitza inauguratu du Pasai Antxon
Gure Zumarditik diseinatuko ditu aurrerantzean pasaitarrentzako politikak koalizioak. Ardatzak: publikotasuna, berdintasuna eta iraunkortasuna.
Julen Rodriguez eta Miren Etxebeste, atzoko inaugurazioan. 
Pasaiako Podemosek egoitza berria du Pasai Antxon. Atzo egin zuten inaugurazio ekitaldia, eta bertan hitza hartu zuten Julen Rodriguez koalizioaren herriko alkategaiak, eta Miren Etxebeste Elkarrekin Podemos Ezker Anitza-IU Berdeak Equo eta Aliantza Berdea koalizioko Gipuzkoako ahaldungaiak.
Beste zenbait kargudun eta militante ere hurbildu ziren atzo, Rodriguezen hitzak entzun eta geroko luntxera batzeko. Antxotarrak adierazi zuen beharrezkoa dela Pasaian gobernu aldaketa “ahalik eta azkarren” egitea, azken bi legegintzaldietan herritarrei “bizkarra emanez” gobernatu izan delako. “Pasaia sistematikoki ahaztua izan da EAJ-PSE bimomioaren politiketan”.
Gure Zumardiko 3 zenbakian dago moreen egoitza, eta bertatik mintzatu zen eleduna, inguruan ikus daitezkeen azpiegiturak jarriz udal gobernukideen praktika txarren adibide gisa: “Topoa lurperatzea dela eta, obra atzeratu egin zen, lehentasuna eman baitzion Donostiako Kontxa hondartzara hurbiltzeari. Atzerago, Luzuriagan etxebizitzak eraikitzeko fasea egin zen, eta zuzkidura-ekipamenduaren fasea ahaztu zen. Eta, azkenik, duela 10 urte baino gehiago, Antxoko osasun-zentroa eraiki zen, egitura aurrefabrikatu batean eta pladurrezko paretekin. Instalazio hori betikotu da Gotzone Sagarduy Osasuneko sailburuaren utzikeria dela eta”.
Rodriguezek gogorarazi zuen, pandemiaren ondoren, euren alderdia izan dela gobernu taldea, aurrekontu akordioen bidez, Karmengo Ama Eskola publikoa sustatzera bultzatu duena. Eta ahalegin bera egin dutela etorkizunean Pasaian emakumeen etxe bat egon dadin, edota erregai fosileko ibilgailuen ordezkapena pixkanakako sustatzeko.
Hiru ardatz izango dituzte Podemosen politikek: publikotasunaren, berdintasunaren eta iraunkortasunaren defentsa.
