PSE-EEk "bete gabeko" proiektuekin "diru publikoa xahutzea" egotzi dio EH Bilduri
Azken aldizkarian "errenteriarren bizimodua hobetzeko" proposatu dituzten "iniziatibak" eta azken urteetan egindako lanaren berri eman dutela esan dute sozialistek.
Aldizkariaren azala. Argazkia: PSE-EE Errenteriarren buzoietara eraman du PSE-EEk bere azken aldizkaria. “Bertan Errenteriaren bizimodua hobetzeko egin ditugun proposamenen, zein azken urteetan egindako lanaren berri eman dugu”, azaldu dute. Proiektuen artean, aita Donosti eta Mauricio Ravel kaleen arteko igogailua, Renferen lur eremuaren lagapena udalari, topoa lurperatzeko proiektua, garapen ekonomikoa eta lana sustatzeko proposamenak, Arramendiko zuzkidura etxebizitzak, Beraungo anbulatorioaren ordutegi murrizketari aurre egiteko “iniziatiba eta lidergoa”, bakardadeari eta pobrezia energetikoari aurre egiteko iniziatibak aipatu ditu alderdi sozialistak.
Aldizkariaren berri ematearekin batera, komunikabideetara bidalitako prentsa oharrean EH Bilduri bete ez dituen proiektuekin “harro agertzea” egotzi dio, eta areago, horietarako “diru publikoa xahutzea”. Isaac Palencia sozialisten bozeramaileak “kudeaketa negargarria disimulatzeko saiakera egitea” aurpegiratu dio alkateari, “hautesleak nahasteko itxurakeri hutsa diren marrazkitxoak kontratatuta. Beraun kalea, Gabierrota pasealekua eta hiltegiaren atzeko aldea, Gaztainoko igogailua eraikitzea, edota adinekoen zuzkidura etxebizitzak horren adibide dira”.
Horiei beste proiektu batzuk gehitu dizkio sozialistak, “aurreko agintaldietatik datozen Beraun Kultur Zentroa, Barandiaran parkea, edota kiroldegiaren handitzea”.
Horiek guztiak Errenteriak “beharrezko duen eraldaketaren” adibide direla erantsi du Palenciak: “Bi aukera baino ez daude, EH Bildu eta Podemos, edota PSE-EE. Alderdi sozialistarena da eraldaketarako aukera erreal bakarra”.
