Aizpea Otaegi: "Asteazkenekoa, txirrindularitzaren festa handia izatea nahi dugu"
Itzuliak hirugarren etapa Errenteria-Oreretan abiatuko du datorren asteazkenean, eta txirrindularitzaren gorenaz gozatzeko aukera izango da udalerrian, beraz.
Itzuliaren etapa aurkezpena gaur. Itzuliak hirugarren etapa Errenteria-Oreretan abiatuko du datorren asteazkenean, eta txirrindularitzaren gorenaz gozatzeko aukera izango da udalerrian, beraz. Gaur aurkeztu dute etapa Itzuliaren ordezkariek, Aizpea Otaegi alkateak, eta Maite Gartzia Kirol Zinegotziak. Beraiekin batera izan dira agerraldian, Laguntasuna Txirrindularitza elkartea, OTXE Oarsoaldeko Txirrindularitza Eskola, Gurpil artean elkartea, Aritz Bagues eta Mikel Ugartemendia txirrindulariak, Ostari zein Errenkoalde elkarteetako kideak, eta Kromosoma Tailerreko kideak.
Asteazkenekoa txirrindularitzaren festa handia izatea nahi dutela esan du Otaegik, “Errenteriari txirrindularitzak asko eman dio, eta horren erakusgarri dira agerraldi honetan dauden txirrindularitza munduko eragileak, zein izan ditugun txirrindulari handiak. Gaur hemen, Aritz Bagues dago, eta berekin batera, aipamen berezia merezi dute Luis Otañok, Ane Santestebanek eta Dorleta Eskamendik. Haiekin akordatu behar gara, Errenteriak txirrindulari horiek guztiak eman dituelako, eta Itzulia hemendik abiatzea bada modu bat txirrindularitza elkarteak, eta horiek, omentzeko”.
Apirilaren 3tik 8ra egingo dute itzulia, eta udalerrira, hilaren 5ean iritsiko da, asteazkena. Villabona-Amasarekin partekatutako etapa izango da Errenteria-Oreretatik abiatuko dena (153,9 kilometro) Otaegik azaldu duenez, “zentzu horretan ere polita da herrien arteko lankidetzaren bidez bi herriak etapa baten parte izatea”.
Asteazkeneko hitzordu nagusiak, honakoak. Txirrindularien sinaduren eta aurkezpenak 12:02tik egingo dituzte Zumardian, hori amaituta irteera marran jartzeko, eta 13:04ean irteera neutralizatua egingo dute, “udalerriaren erdigunean barrena 3,5 kilometroko ibilbidea egingo dute txirrindulariek, herri barruan ere goza dezagun askoz polikiago joango diren txirrindulariez”. 13:39an benetako irteera izango da Donostiarako norabidean, Olibetetik abiatuta.
Zumardia izango da guztiaren epizentro baina Fanderia etorbideak ere kolore berezia hartuko duela Itzuliarekin nabarmendu du alkateak, “parte hartuko duten ziklisten kamioiak, trailerrak eta bestelakoak ikusteko parada izango da bertan, polita izango da”.
Hitzorduaren garrantziagatik zalantzarik ez du Otaegik bisitariak ere izango direla herrian. Horientzat mezu garrantzitsua helarazi du, “garraio publikoa erabili dezatela, mesedez”. Herritarrei ere helarazi die mezua, “goza dezatela. Asteazkenekoa beroketa da, Tourra hemendik pasako delako bi hilabete barru”. Eragileei eskerrak eman dizkie azkenik alkateak, erakutsitako jarrera eta inplikazioarengatik. bide beretik mintzatu da Gartzia, berak ere eskertu egin du eragileen inplikazioa antolaketan, “Itzuliaren etapa hau Errenteriatik abiatzea posible egin duten guztiei, gogor egin dutelako lan herritarrek honetaz gozatzeko”. Giro “polita” izango dela asteazkenean eta herritarrak kalera atera eta txirrindularitzarekin gozatzera animatu ditu Kirol zinegotziak ere.
Azken aipamen bat ere egin du Otaegik gaurko agerraldian. izan ere, gogora ekarri du Errenteria 700 urteurrenaren barruan Itzulia udalerrira ekarri nahi zutela, “ez zen orduan posible izan, baina aurtengoa, urteurrena pasata badago ere, keinu bat bada urteurrenari, eta agintaldia amaitu aurretik behintzat hemendik abiatuko da”.
Itzuliaren bueltan programazioa
Itzuliak hirugarren etapa Errenteria-Oreretan abiatuko duela eta, hainbat ekintza antolatu dituzte udalerrian aurreko egunetan. Horietatik lehena gaur bertan izango da. Fanderiako garbigunean bizikletak garbitzeko tailerra izango da Mikel Ugartemendiak gidatuta, 17:30ean.
Apirilaren 3an, astelehena, bizikleta motiboekin puzzleak eta giltzatakoak egiteko doako tailerra eskainiko dute Zumardian, 17:30ean. Asteartean, berriz, bizikleta motiboekin poltsak margotzeko tailerra egingo dute Zumardian, 17:30ean. Tailerrak doakoak dira eta ez da aurretik izena eman beharko parte hartzeko.
Galtzarabordako kiroldegiko sarreran, berriz, txirrindularitzaren gaineko erakusketa dago zabalik, eta Zumardiaren pareko faroletatik bizikletak zintzilik jarri dituzte. Gabierrota, Beraun eta Galiziako biribilguneetan ere jarri dituzte bizikletak, girotzeko. Amaitzeko, Errenkoalde Merkatari elkartearen iniziatibaz, 100 denda baino gehiagok erakusleihoak apaindu dituzte bizikleta motiboekin.
Laguntasunari omenaldi txikia
Txirrindularitzak arrastoa utzi duela, eta horretan jarraitzen duen zalantzarik ez da. Horren harira, Errenteriako Udalak omenaldi txiki bat eskainiko dio Laguntasuna Txirrindularitza elkartea apirilaren 5ean bertan, Itzuliaren irteeraren aurretik. Udalerrian txirrindularitza sustatzeko egindako lana eskertu eta aitortu nahi dio udalak elkarte horri. Niko Santesteban elkarteko kidea, “oso ondo daude aitortzak. Elkarte bat jende mordoa da, eta gureak 34 urte daramatza martxan, ikaragarrizko jende pila pasa da bertatik eta horiei guztiei esker da”.
Aipamen berezia egin dio presidente den Jose Cruz Legorbururi, “1989an berak sustatu zuen. Gabierrotako gazte batzuek bizikletan nahi zuten ibili, lasterketak egin, eta berak jarri zuen martxan auzo elkartetik txirrindularitza taldea. Lan handia egin du”. Pozik azaldu da Santesteban “egindako lana” aitortuko dietelako, baina ahaztu gabe, lan horren guztiaren atzean hamarnaka lagun daudela, “Ivan Ruiz Perez, eta Loli Gonzalez tartean. Emakume asko ez ditugu izan zuzendaritzan zoritxarrez, txirrindulari emakumeak bai… Familia ugari izan dira lanean errealitate bihurtzeko. Horientzat guztientzat izango da aitortza”.
