Lekuona ezagutzeko, esperientzia gidatua
Bisita gidatu batetik harago doan zeharkaldia egin dezakete Lekuona Fabrikatik herritarrek. Lehena hilaren 22an izango da.
Ez dira ohiko bisita gidatua izango. Esperientzia gidatuak izango dira. Lekuona Fabrika ezagutzeko esperientzia gidatu horiek datozen larunbatetan izango dira, lehena hilaren 22an: 10:00etan gaztelaniazkoa, 12:00etan euskarazkoa; hurrengoa, hilaren 29koa, alderantziz izango da, hau da, lehenik euskarazkoa eta segidan gaztelaniazkoa (ordubete inguruko jarduera da). “Bisita gidatu konbentzionalaz harago joan nahi duen bizipena eskainiko zaie herritarrei, kultur proiektua bera barrutik zeharkatzeko eta ezagutzeko helburuarekin”, zehaztu du Errenteriako Udalak. Doan dira bisita horiek.
Proposamenaren diseinua Dejabu konpainiaren eta Mmej arkitektura bulegoak garatu dute. Beraz, arte eszenikoak eta arkitektura elkarrizketan jarriko dituzte bi eragileek esperientzia horretarako.
Bisitak doan dira, baina aurrez izena mean behar da. Izan ere, bost laguneko gutxieneko taldeak osatu behar dira bisitaldi bakoitza aurrera atera dadin (taldeen pertsona muga hamabi lagunekoa da). Taldekideen kopurua bostera iritsiko ez balitz, bertan behera geldituko litzateke bisita. Izen emateak udalaren sarreren salmenta zerbitzuan edo Lekuona Fabrikan bertan egin daitezke, bisitaren aurreko asteazkeneko 12:00ak arte.
