Odola emateko aukera, hilaren 19an, Antxon
Gazteei batez ere esan diete elkartasun keinua egin dezatela. 18 urtetik gorakoek eman dezakete odola.
Anbulatorioan izango da odola emateko saioa. Odola emateko saioa antolatu dute Antxoko odol emaileen taldekoek, hilaren 19rako (asteazkena), barrutiko anbulatorioan. Elkartasun keinua egin nahi dutenek egun horretako 16:30etik 20:15ak arte izango dute horretarako aukera. Anbulatoriora itzuli dira saioak, baina oraindik ere osasun segurtasun neurriak kontuan hartu behar dituzte emaileek: maskara derrigorrezkoa da, pertsonen arteko tartea errespetatu behar da, eskuak garbitu behar dira, eta COVID-19arekin harremana duen sintomaren bat dutenei ez joateko esan diete.
Antxoko odol emaileek ohikoa dute aurreko saioetan jasotako emaitzen berri ematea. Hala, jakinarazi dute martxokoan 29 odol poltsa jaso zituztela, eta horiek ohiko emaileenak izan zirela. Hau da, ez zen emaile berririk agertu. Beraz, dei garbia egin diete oraindik ere odola ematera animatu ez direnei: “Emaile berriak beharrezkoak izaten dira naturaltasunez izaten diren bajak ordezkatzeko”. Gazteei egin diete deialdi berezia: 18 urtetik aurrera egin daiteke elkartasun keinua.
