Errenteriako PSE-EEk asteburuetan zabalik nahi du Lekuona
Gobernu taldeari egotzi dio bertako programazioa "anbiziorik gabekoa" eta "urria" dela. Abian den sinadura bilketarekin bat egin du.
Errenteriako PSE-EEk, haren alkategai Isaac Palenciaren adierazpenekin, eskatu du Lekuona Fabrika asteburuetan ere zabal dadila. Adierazpenak abian den sinadura bilketa baten harira egin ditu; horren bidez, Lekuona asteburuetan irekita izan dadila eskatzeko atxikimenduak biltzen ari dira herrian. Sinadura bilketa horrekin bat egin dute sozialistek. 2021eko maiatzean zabaldu zen espazioak hainbat eremu bilduta ditu bere barruan, tartean Sorlekua areto nagusia edo udal biblioteka direla beste askoren artean. Indarrean den neguko ordutegiaren arabera, liburutegia astelehenetik ostiralera 09:00etatik 20:00etara, eta larunbatetan 09:00etatik 14:30era zabaltzen dute.
PSE-EEko kideak oroitarazi du “duela ia bi urte” aurkeztu zutela Lekuona asteburuetan ere zabaltzeko proposamena: “Ez dugu ulertzen erreferente izan nahi duen gune kultural bat nola egon daitekeen astegunetan bakarrik irekita, eta gainera, hain programazio urriarekin”.
Palenciak Lekuonaren programazioari buruzko iritzietan oinarritu du prentsa ohar bidez helarazitako kritika. Adierazi du Lekuonak asteburuetan programazio “osoagoa” izan beharko lukeela, eta astegunez gain asteburuetan ere irekita beharko lukeela, “horrela instalazioari etekinik handiena atera ahal izateko, herritarrei nahiz eragileei dauden espazio guztiak eskainiz erakusketak, hitzaldiak eta bestelakoak egiteko”.
Hala, Lekuonako programazioa lantzerakoan udal gobernuari (EH Bilduk eta Errenteria Elkarrekin-ek osatzen dute) “anbiziorik gabekoa” izatea egotzi dio Palenciak: “Hilean jarduera bakarra egiten da. Horrek agerian uzten du EH Bilduk eta Elkarrekin Errenteriak herriko kultura sustatzeko duten konpromiso eza. Gu udal gobernura iristerakoan kultur eskaintza zabalduko dugu, kualitatiboki eta kuantitatiboki”. Datu bat eman du sozialistak: “Urtarriletik ekainera udalak bost programazio proposatu ditu, hainbat emanaldi batera egin daitezkeen kultur zentro baterako”.
Hitzematea egin du Palenciak: “Gure konpromisoa da Lekuonako kultur programazioa handitzea, eta eskaintzen diren jardueren kalitatea hobetzea. Gainera, asteburuetan bertako zerbitzuak irekita nahi ditugu. Gizartearen garapen eta ongizatean ezinbesteko zutabea da kultura. Ezin gara atzean gelditu”.
