Gipuzkoako Batel Txapelketa, asteburuan Donibanen
Larunbatean, Gipuzkoako Ligako 11. lehia eta herrialdeko txapelketako finaletarako sailkapen estropadak jokatuko dira. Igandean, finalak.
San Juango batel bat, aurtengo Gipuzkoako Ligan. Pasaiako badian jokatuko da asteburuan Gipuzkoako Batel Txapelketa, Donibanen. Pasai Donibane-Koxtape Arraun Elkarteak antolatu du lehia: larunbatean (16:30) txapelketaren finalerako sailkapen estropada izateaz gain, Gipuzkoako Ligarako puntuagarri izango da (11. jardunaldia da). Igandean, larunbatean lortutako emaitzen araberako finalak izango dira jokoan, 10:00etan hasita.
Lehian Oarsoaldeko batelak izango dira: San Juangoak, San Pedrokoak eta Hibaikakoak. Horiez gain herrialdeko beste arraun elkarteetako dozenaka ontzi bilduko dira badian. Larunbateko probak erlojupekoak izango dira, eta batelak binaka aterako dira. Igandeko finaletan, berriz, launaka aterako dira, lerroan.
Haur Mailako arraunlariek 1.000 metroko estropadak egingo dituzte; kadeteek, berriz, 1.500ekoak. Gazte Mailako nahiz seniorretako norgehiagoken luzera 2.000 metrokoa izango da.
Irabazteko aukerak
Gipuzkoako Batel Ligako emaitzei erreparatuta, Oarsoaldeko hainbat ontzik aukera sendoak dituzte bai liga irabazteko, zein txapelketako txapelak lortzeko. Datu gehiago izateko, hemen Gipuzkoako Batel Ligako sailkapen nagusien zerrenda.
Mutilen Haur Mailan, adibidez, San Pedro A ligako lider garbi da, eta ezusteko handia litzateke herrialdeko liga ez irabaztea, bigarren den Zumaiari bederatzi puntuko aldea ateratzen diolako sailkapen nagusian (larunbateko irabazleak 8 puntu eskuratuko ditu). Promesa mutiletan ere San Pedro ligako buru da, Tolosaldeari 8 puntuko diferentzia ateratzen diolako sailkapenean: hor ere moreek aukerak dituzte liga irabazteko, eta txapelketan goialdean ibiltzeko. Kategoria horretan irabazleak 17 puntu jasoko ditu, eta sailkapenean hurrengoek puntu bat gutxiago postuetan beherantz egin ahala.
Nesken Gazte Mailan lehia estua espero da San Juan Aren eta Tolosaldea Aren artean. Arrosak ligako lider dira 46 punturekin, baina Tolosaldea puntu bakarrera dute. Estropada irabaziko duenak zazpi puntu lortuko ditu, eta bigarrenak sei. Ligan jokoan izan diren zortzi estropadetan bi batelek lortu dituzte beti lehen bi postuak, batzuetan sanjuandarrek, besteetan Tolosaldeakoek.
Mutilen Gazte Mailan liga bere egin du San Juanek. Jokoan izan diren zortzi lehietan 40 puntu eskuratu dituzte, eta bigarren den San Pedrok 33 ditu. Irabazleak 6 puntu lortuko dituenez, moreek ezineko dute jada arrosen albora iristea.
Senior emakumeetan, ligan ez da izan Oarsoaldeko ordezkaririk. Bai, ordea, gizonetan: maila horretan Donostiarra Arentzat izango da ligako garaipena, sailkapen nagusian 63 puntu dituztelako, eta San Juan Ak 51: larunbateko irabazleak 9 puntu eskuratuko ditu. Maila horretan San Pedro laugarren da sailkapen nagusian.
Aurrekoak ligako sailkapen nagusiaren araberako pronostikoak dira. Gipuzkoako Txapelketan, batelen bilakaera ikusita, antzekotasunak izan daitezke. Baina itsasoan berretsi behar dute hori arraunlariek.
