Bihartik aurrera, Habian!-en sortzaileen erakusketa Jantziaren Zentroan
Sei artista gazteren sorkuntzak egongo dira ikusgai ekainaren 15era arte. Joskintza diseinuak, joko didaktikoak nahiz bitxi eta eskulturak jarriko dituzte.
Bihar, larunbata, Jantziaren Zentroan Habian! fabrika kreaktiboko sortzaileen erakusketa egongo da, beheko solairuan. Bertan, sei artista elkartuko dira, eta erakusketa bateratua antolatu dute. Horiek Saioa Matxain jostun diseinatzailea, Ruben Pantiga jostun diseinatzailea, Ainhoa Ibarguren eskultore eta bitxigilea, Marta Marek artisaua, Jaizki Bakaikoa jostun diseinatzailea eta Elena Ranz jostun diseinatzailea dira. Lehenengo hiruek badute esperientzia Jantziaren Zentroan, eta gainontzekoak estreinakoz arituko dira. Erakusketa ekainaren 15era arte egongo da zabalik, asteburuko ordutegian: larunbatetan 11:00etatik 14:0etara, eta 17:00etatik 20:00etara; eta igandetan 11:00etatik 14:00etara.
Hala, datozen bi hilabeteotan honako sorkuntzak egongo dira ikusgai:
- Bakaikoak Carmen erakusketa jarri du, euskal arrantzaleen bizitzan oinarritutakoa eta kolore naturalak erabiliz. Finean, bildumak itsasoaren edertasuna eta arrantzaleen bizitzaren gogortasuna nahi ditu islatu.
- Pantigak, klima aldaketa eta jasangarritasunaren inguruko lanketa oinarri, Rewear moda jasangarria aurkeztuko du: bildumako pieza bakoitza iraunkortasuna aintzat hartuta diseinatu ditu, berrerabilitako ehunak baliatuta.
- Matxainek Milk Glass bildumako hainbat pieza aurkeztuko ditu, kristal opalinoan oinarritutako hainbat jantzi. Portzelana itxurako beirak zuri krematsu, urdin argi edo arrosa koloreak ekarriko ditu erakusketara.
- Ranzek Kaisho haur markako hamaika jantzi aurkeztuko ditu: hiruna hazkuntza mailakatuko, kamiseta-praka eta bainujantzi diseinu; eta beste bi bata.
- Mareken Marta Sensorial markako fentruzko mural didaktiko-sentsoriala egongo da erakusketan, trebetasunen garapenerako balio duena.
- Ibargurenek Kurba bildumako brontzezko bost eskultura, Lotuneak bildumako pieza bat, eta zilarrezko bost eraztun jarriko ditu ikusgai.
Sei sortzaileak Habian! hazitegiko egoiliarrak dira, 2016an Errenteriako Udalak eta Oarsoaldea Garapen Agentziak artisau eta sormen lanbideak hauspotzeko martxan jarri zuten egitasmoaren baitan.