EH Bildu Altamirako bizilagunekin batzartu da
Auzotarren iritziz, udalaren eta beste erakundeen partetik "utzita" dago auzoa. EH Bilduk horri aurre egiteko konpromisoa bere egin du.
Batzarraren une bat. Altzate elkartean izan zen. Udal hauteskundeetarako herri programa osatzeko, “eta datorren agintaldian haiekin harremanean segitzeko”, herriko eragileekin eta herritarrekin oro har biltzen ari dira Lezoko EH Bilduk maiatzaren 28ko udal hauteskundeetarako osatu duen hauteskunde zerrendako kideak. Azken batzarraldia atzo bertan (asteartea) egin zuten, Altamira auzoko bizilagunekin. Altzate elkartean bildu ziren.
Batzarraren gaineko informazioa zabaldu du koalizioak. Esan du, Altamirako bizilagunen kezkarik handiena “Lezoko Udalaren eta beste erakundeen aldetik jasaten duten utzikeria” dela, eta horren erakusle direla, bizilagunen esanetan, “garbitasuna, kaleen eta bazterren mantenua, argiteria, anfiteatroa, segurtasuna, mugikortasuna eta udalarekin harremana”. Horiei aurre egiteko konpromisoa hartu dute bilkideek, atzoko bilkuran izan ziren Mikel Arruti alkategaiaren, eta Miren Ormazabal, Aitzol Saizar eta Jon Legorburu zerrendakideek hori hitzeman zieten auzokideei.
Lezoko EH Bilduk jakinarazi du jada herriko 25 elkarterekin egin dituela bilkurak, “herritarrekiko gertutasun seinale gisa”. Horrez gain, Gaintxurizketako biztanleekin ere batzartu da, atzo Altamirakoekin egin bezala: “Gure ariketa nagusia haiei entzutea da”. Datorren asteartean Pisbe, San Pedro eta Lopeneko bizilagunekin bilduko dira, 19:00etan, Kike tabernan.
