Lezoarren ekarpenak jaso ditu Joxean Sanchezek
Horiek hauteskunde programan txertatuko dituela adierazi du Lezoko PSE-EEren alkategaiak. Parte hartze prozesua egin dute sozialistek horiek biltzeko.
Joxean Sanchez, PSE-EEren hauteskundeetarako lokalean. PSE-EEren alkategai Joxean Sanchezek jakinarazi du Lezoko bizilagunen, elkarteen eta kolektiboen ekarpenak, iradokizunak eta ideiak jaso, eta horiek aintzat hartuko dituela. Prozesu parte hartzaileak bideratu dute horiek jasotzeko herriko sozialistek. “Ideia eta proposamen guztiak, denak izango dira lehentasunezkoak niretzat eta nire taldearentzat, eta bat bera ere ez da atzera botako. Gure konpromisoa horiek errealitate bihurtzea izango da”, esan du Sanchezek. Pozik agertu da PSE-EEren alkate izateko hautagaia jasotakoekin. Horiek hauteskunde programan jasoko dituzte, “integratzaileagoa eta adostuagoa” izateko.
Jasotako ekarpenetako batzuk nabarmendu ditu Sanchezek. Adibidez, aparkatzeko arazoen gainekoak jaso dituela adierazi du, baita auzo batzuetan hiri mantenurako dauden beharrak ere. Kutsadura akustikoaren inguruko kezkak ere iritsi dira harengana, portuak eta herritik igarotzen den trafikoak eragindakoak. Gazteei begirako ekarpenak ere daude sozialisten eskuetan: horien protagonismo handiagoa, eta emantzipazioa errazteko neurriak eskatu dituzte.
Parte hartze prozesua baikor baloratu du Sanchezek, uste duelako herritarrak eta gizarte eragileak inplikatu direla. “Frogatuta geratu du gure bizilagunen ahotsa entzuteko komunikazio-ildoak jartzen direnean, herritarrak aktiboki inplikatzen direla herriaren hobekuntzan”.
Aurkeztuko duten hauteskunde programaren gainekoak aurreratu ditu, traza nagusietan, Sanchezek. Esan du bertan jasotakoak “gauzatzeko moduak” izango direla, eta horiek egikaritzeko herritarren konfiantza lortzeko saiakera egingo dutela. “Udal kudeaketan sozialistek eskaintzen dugun sinesgarritasuna egiaztatua geratu da. Gure helburua da seriotasunez eta eraginkortasunez lan egiten jarraitzea, lezoarrei entzuteari utzi gabe”.
