"Orain da momentua"
Lezoko parkeek zaintza eta eraldaketa dutela aldarrikatzeko mobilizazioa egin zuten atzo arratsaldean plazan.
“Lezoko parkeek eraldaketa eta zaintza” behar dutela aldarrikatzeko ekintza sorta egin zuten atzo Gurutze Santuaren plazan, udaletxearen parean. Pankartak jarri zituzten, talde argazkia atera zuten, eta sinadura bilketari ekin zioten. Herriko guraso talde baten ekimenez sortutako mugimendua da herrirako haur parke duinak aldarrikatzekoa. “Orain da momentua”, esan zuten bildutakoek. Udalari parkeen gaineko ardura har dezala eskatu zioten, hobetu, zaindu eta egoki manten ditzan.
Guraso taldeak azaldu duenez, “Lezoko parkeek erronka aldetik gauza berbera” eskatzen dute, “oso pobreak dira. 0-2 urteko txikiek eta nerabeek eskaintzarik ez dute. Parkeak abandonatuta daude, puskatuak, zikinak…”.
Atzokoa eginda, datorren asteko ostegunerako iragarri dute hurrengo mobilizazioa: hilaren 27an bilduko dira, 18:30ean, plazan, “ume, haur eta nerabeen ahotsa izaten jarraitzeko. Geroz eta gehiago gara mugimendu honetan”.
