Frantziako Tourragatik, egokitzapen lanak egiten ari dira Lezoko errepideetan
Uztailaren 2an eta 3an pasako da Lezotik lasterketa. Jaizkibel hiribideko errepideko erdialdeko irlatxoak kentzen ari dira.
2023ko Frantziako Tourreko bigarren eta hirugarren etapak, uztailaren 2an eta 3an hurrenez hurren, Lezotik pasako dira. Uztailaren 2koan Jaizkibel hiri9bidea zeharkatuko du probak, Donostiaranzko bidea hartzeko (hiriburuan bukatuko da etapa); 3koan, berriz, Donostiatik herriranzko bidea hartuko du munduko etapakako txirrindularitza probarik garrantzitsuenak, Altamirako biribilgunean Errenteriarantz jarraitzeko. Horiek horrela, Jaizkibel hiribideko errepidearen bi noranzkoak banatzen dituen irlatxo gorriak kentzen ari dira, txirrindulariek errepidearen zabalera osoa oztopo arriskurik gabe har dezaten.
Gipuzkoako Foru Aldundiko Bide Azpiegituretako zerbitzua ari da lan horiek egiten “Tourra munduan zuzenean ikusle gehien biltzen dituen bigarren proba da; horrek eta antolakuntzaren tamainak eraginak ditu zeharkatzen dituen inguruetan”, esan dute Lezoko Udaletik.
Horrez gain, udalak adierazi du denboraz jakinaraziko diela herritarrei lasterketak zer eragin izango duen herriko trafikoan.
