Madalenetako kartel lehiaketan lanak aurkezteko epea, zabalik
Aurten haurren lehiaketa ere antolatu du udalak. Interesdunek maiatzaren 11 izango dute lana bidaltzeko epe muga.
Iazko kartel lehiaketako irabazlea. Hogeita hamazazpigarrenez, Errenteriako Udalak Madalenak 2023 jaietako kartel lehiaketa antolatuko du. Aurtengo berrikuntza nagusia bi lehiaketa antolatuko dituztela da: nagusiena eta haurrena. Horrela, DBHko bigarren maila arteko haurrek parte hartzeko aukera izango dute, eta irabazlea Madalenetako haurren programazioko irudia izango da.
Kartelak herriko jaiekin zerikusia izan behar du, eta parte hartzaileek Herri Biziaren webgunera bidali behar dituzte lanak, JPG formatuan. Izena emateko epea zabalik dago honezkero, maiatzaren 11ra arte. Epaia maiatzaren 31n jakinaraziko dute: nagusien irabazleak 1050 euro jasoko ditu, eta haurren kategoriakoak eskola materiala erosteko 150 euroko bonoa.
